O Grupo Municipal Socialista de Santiago criticou con dureza a decisión do goberno local de instalar novos radares fixos e un semáforo con cámara, ao considerar que se trata dunha política “claramente sancionadora” que prioriza a recadación fronte á prevención viaria.
Líder Redacción
13 de enero de 2026 a las 20:32
As e os socialistas advirten de que esta medida contradí o propio discurso defendido pola alcaldesa, Goretti Sanmartín, no ano 2020, cando apostaba por campañas de concienciación, planificación urbana e calmado do tráfico como eixos fundamentais da seguridade viaria.
A concelleira socialista Abal insistiu en que existe unha orde lóxica nas actuacións de mobilidade: primeiro o redeseño das rúas e o calmado físico do tráfico, despois a xestión intelixente da circulación e a educación viaria, e só como último recurso a aplicación de sancións en puntos xustificados con datos públicos. “Non é o caso destes novos radares”, sinalou.
Desde o PSdeG tamén alertan de que hai vías con menor tráfico e límites de velocidade reducidos que resultan máis perigosas pola elevada presenza peonil, pero que non están a ser priorizadas polo goberno municipal. Pola contra, denuncian que a política actual prevé duplicar os ingresos por multas, segundo recollen os propios orzamentos, o que pon en cuestión o discurso oficial de que non existe afán recadatorio.
Para o Grupo Socialista, a seguridade viaria debe basearse na planificación, na transparencia e na coherencia política, e non na imposición masiva de sancións sen medidas preventivas previas nin datos públicos que as avalen.
Recibe las noticias en tu correo.
