Cinco persoas detidas polos roubos en comercios de Santiago

A Policía Nacional detivo cinco persoas como presuntas responsables de varios roubos en establecementos comerciais de Santiago de Compostela. Os arrestados, todos con amplos antecedentes en delitos contra a propiedade, están relacionados con un aumento significativo destes delitos desde o pasado Nadal e durante o mes de xaneiro. Esta vaga de roubos afectou nas últimas semanas a negocios dos barrios de Galeras, Santa Marta e outras zonas como o casco histórico da cidade.

As detencións son resultado dun dispositivo especial coordinado entre a Policía Nacional e a Policía Local, o cal permitiu «esclarecer numerosos delitos», segundo indicaron as forzas de seguridade nun comunicado. As investigacións realizadas pola Comisaría de Santiago, xunto coa análise de intelixencia e o incremento de efectivos policiais dedicados á prevención e resposta, foron clave para lograr estes arrestos.

O ‘modus operandi’ dos detidos era semellante na maioría dos casos: empregaban tapas de sumidoiro e outros obxectos contundentes para romper cristaleiras ou utilizaban ferramentas para forzar portas e pechaduras, nunhas actuacións que, segundo a Policía, eran pouco planificadas e «na maioría das ocasións, motivadas pola adquisición de droga para o seu consumo».