En resposta ao chamamento realizado para prestar asistencia de emerxencia na Comunidade Valenciana, catro voluntarios de Protección Civil de Val do Dubra partiron este luns 4 de novembro para unirse ás operacións de axuda nas zonas afectadas, concretamente no Concello de Moncada.
Líder Redacción
4 de noviembre de 2024 a las 21:36
Os voluntarios, capacitados en intervencións de emerxencia, responderon á solicitude de recursos humanos para apoiar ás infraestruturas de rescate e recuperación nas áreas prexudicadas.
Os membros de Protección Civil de Val do Dubra que se desprazan nun todoterreo pickup con carro de emerxencias e nunha furgoneta, van no convoi que sae de Galicia e levan consigo o equipamento necesario para realizar labores de limpeza e reconstrución: bombas de achique, motoserras, anciños, cepillos, pas —entre outras ferramentas, ademais de mascarillas para nenos e adultos—.
A colaboración destes voluntarios demostra o compromiso solidario de Val do Dubra coas necesidades doutros territorios.
Ao mesmo tempo, o Concello de Val do Dubra, celebrou hoxe unha xunta de voceiros urxente, presidida polo alcalde e na que participou o presidente da Agrupación de Voluntarios de Protección Civil de Val do Dubra, na que se compartiu toda a información da saída á Corporación e se acordou a disposición dos recursos para a mesma.
En dita xuntanza, expresouse a solidariedade coas vítimas da catástrofe así como o agradecemento pola dispoñibilidade dos voluntarios nestas tarefas en nome de toda a Corporación e veciñanza dubresa.
Tamén se acordou quedar a espera de posteriores accións, como o envío de material ou alimentos, para cando as autoridades valencianas o precisen e requiran.
Polo momento, segundo as indicacións dos responsables de distribución en terreo, a prioridade é a axuda humana nas labores de limpeza e reconstrución xa que hai problemas de loxística e almacenamento de materiais e alimentación ao estar os espazos saturados.
Recibe las noticias en tu correo.
