Brión aproba dúas modificacións de crédito por máis de 2,24M€

• O Concello prorrogará os orzamentos de 2024 e comezará a traballar na elaboración das contas de 2026

19 de xuño de 2025.- O anuncio do acordo alcanzado polos grupos municipais do PSOE e PP, para garantir a estabilidade necesaria para sacar adiante proxectos e medidas que contribúan a mellorar a calidade de vida dos veciños e veciñas de Brión, eclipsou a aprobación de dúas modificacións de crédito na sesión plenaria do onte mércores. Dúas iniciativas que suman 2.243.326 euros, que serán destinados á realización de obras e prestación de servizos aos veciños e veciñas do municipio, e que foron aprobadas cos votos a favor dos grupos socialista e popular, coa abstención do grupo municipal do BNG.

Así, a modificación de crédito número 10/2025, baixo a modalidade de suplemento de crédito, suma 1.823.406,93 euros, financiados con cargo ao Remanente de Tesourería para gastos xerais. As partidas máis importantes correspóndense coa financiación de dúas achegas municipais a dúas obras que xa están en marcha: o acondicionamento, humanización e renovación do saneamento na AC-543 (815.317 euros) e a ampliación do pavillón municipal de deportes (390.346 euros).

A maiores contémplanse máis de 200.000 euros para a mellora do servizo de abastecemento de auga, así como á realización dunha auditoría para detectar perdas nese abastecemento. Ademais, inclúense tamén partidas para obras de mellora de camiños rurais, recuperación do patrimonio municipal e mantemento do campo de fútbol de Luaña.

En materia de servizos, a partida máis importante é a de 257.500 euros para o servizo de recollida do lixo por parte da Mancomunidade Serra do Barbanza. Tamén se inclúen outras partidas de menor importe para actividades deportivas e de turismo, así como para manter o servizo de transporte ao centro médico de Brión.

Campo de fútbol de Bastavales

A segunda modificación de crédito aprobada onde, baixo a modalidade de crédito extraordinario, ascende a 419.920 euros, que será tamén financiado con cargo ao Remanente de Tesourería para gastos xerais. Nesta ocasión, destacan os 187.917,36 euros para a achega municipal ao acondicionamento e remodelación do campo de fútbol José Pumar (Bastavales), solicitado pola veciñanza e polo Bastavales UD, cuxo proxecto foi redactado pola Real Federación Galega de Fútbol tras o convenio asinado polo alcalde bionés, Pablo Lago, co daquela presidente de la Federación, Rafael Louzán.

Este crédito extraordinario tamén permitirá a instalación de luminarias na recentemente construída senda peonil entre O Cabo e Bertamiráns, a mellora da eficiencia enerxética da escola de música, a instalacións dun grupo de presión en Coruxido ou a execución dun mural na honra a Xosé Vizoso, artista recentemente falecido, na fachada da escola municipal de música “Magariños”. Tamén se recollen os case 44.000 euros para a achega municipal ao arranxo do camiño de Codesido a Sabaxáns, que se executará en colaboración co Concello de Rois e a Xunta.

Orzamentos de 2025

A aprobación destas dúas modificacións orzamentarios motivou que na quenda de rogos e preguntas a voceira municipal socialista, Sandy Cebral, confirmara que “imos prorrogar os orzamentos de 2024. Iso é así porque, tras consultar a Intervención Municipal, comprobamos que os gastos a afrontar son practicamente idénticos aos de 2024. Se a iso lle engadimos que non hai uns Orzamentos do Goberno de España, entendemos que o documento sería practicamente igual ao que xa temos. Polo tanto, a nosa intención é seguir as recomendacións dos técnicos e prorrogar o Orzamento en vigor”.

Neste sentido, a concelleira puxo en valor que tanto o equipo técnico como o equipo de Goberno poderán “comezar a traballar nos orzamentos de 2026, xa que eses si que serán diferentes porque, entre outras cousas, haberá que recoller as bonificacións do préstamo do IDAE para o cambio do alumeado público en todo o municipio e actualizar a ordenanza municipal da recollida do lixo, para adaptarnos á lexislación vixente e cumprir coa débeda que todos os concellos temos coa Mancomunidade Serra do Barbanza”.

Minutos antes, o Pleno Municipal tomou conta do informe de liquidación do Orzamento de 2024, que confirma a boa saúde económica do Concello de Brión e a boa xestión realizada polo equipo de Goberno, que cumpre cos obxectivos das tres regras fiscais: estabilidade orzamentaria, gasto e débeda pública. Unhas contas que ascenden a 7.771.316 euros, un 6,88% máis ca en 2023, e que se pecharon cun Remanente de Tesourería para Gastos Xerais de 3.807.652 euros.