Brión acolle a entrega do VIII Premio Laudamuco e a estrea de “Polo de Franco”
A sala municipal de exposicións de Brión acollerá hoxe sábado 16 de maio, ás 18:00 horas, o acto de entrega da oitava edición do Premio Laudamuco para textos teatrais, un certame literario convocado polo Concello de Brión, a Academia Galega de Teatro e Edicións Positivas. Un acto presidido polo alcalde de Brión, Pablo Lago Sanmartín, que fará entrega do galardón á coruñesa María Peinado Casal pola súa obra «Maseira”. Un premio consistente nunha figura conmemorativa elaborada polo artista Xosé Vizoso, unha achega económica de 7.000 euros e a edición da peza por parte de Edicións Positivas, libro que será agasallado ás persoas presentes no acto.
Líder Redacción
16 de mayo de 2026 a las 14:21
O xurado destacou da obra premiada “a súa orixinalidade, temática, uso da lingua e estrutura teatral”. Así mesmo, salientou “o seu carácter antibelicista, tratado dunha maneira non dogmática, o que permite unha lectura crítica e aberta. A narración constrúe un certeiro retrato dun mundo apocalíptico que conecta directamente coa realidade que vivimos no presente: a proposta sitúase en sintonía coa actualidade internacional, pero mantense ben asentada na realidade galega”.
Polo de Franco
Despois, o centro social polivalente de Brión acollerá a estrea de “Polo de Franco”, unha nova produción unipersoal de Teatro Noroeste consistente nunha comedia protagonizada por Luma Gómez, actriz que vén de recibir o Premio de Honra Marisa Soto 2026 á súa traxectoria, entregado no marco dos XXX Premios María Casares. O espectáculo, escrito e dirixido por Eduardo Alonso, é unha comedia que xira arredor da figura histórica Carmen Polo, a esposa do ditador franquista.
O espectáculo, producido por Teatro do Noroeste, conta coa colaboración do Concello de Brión, onde se levará a cabo a estrea e a residencia técnica da montaxe. A estrea terá lugar no Centro Social Polivalente de Brión o sábado 16 de maio, ás 20:30 horas. Tamén contará cunha segunda función o luns 18 de maio, que será unha representación para o alumnado do IES de Brión.
A obra está dirixida por Eduardo Alonso, autor prolífico do teatro contemporáneo galego que ten un especial interese no traballo de textos ambientados na guerra civil, posguerra e franquismo. De feito, esta xa sería a súa sexta obra dramatúrxica sobre esta temática. Desenvolveu o proceso creativo a partir dun traballo de investigación e documentación histórica que foi trasladado a unha linguaxe teatral nun formato accesible para o público contemporáneo. É unha revisión accesible, crítica e con enfoque de xénero da historia recente promovendo a memoria democrática, con especial atención no público adolescente e a mocidade. Este espectáculo é froito dunha investigación histórica.
O proxecto pon o foco nunha personaxe feminina que na historia do noso país foi tradicionalmente situada nun segundo plano nos relatos oficiais. A través dunha proposta escénica que combina humor, ironía, rigor histórico e proximidade, constrúe un diálogo interxeracional co presente que cuestiona a representación do poder na historia.
