Así será a decoración do Nadal da Estrada que se acenderá o 5 de decembro
A instalación comezou este venres e suporá o despregue de medio millón de luces micro led para ambientar estas festas.
Líder Redacción
A instalación comezou este venres e suporá o despregue de medio millón de luces micro led para ambientar estas festas.
Líder Redacción
18 de octubre de 2025 a las 23:09
Seguimos apostando polo alumeado, sen perder a cabeza. É un reclamo indiscutible que favorece ao comercio e a hostalería da Estrada nunha das campañas máis importantes do ano”, sinala Óscar Durán.
A Estrada, 18 de outubro de 2025.- Co Samaín e os magostos chamando á porta, os traballos para a instalación do alumeado de Nadal arrancan estes días na Estrada. O Concello leva semanas traballando para deseñar como será a ornamentación coa que acender este ano as festas nas rúas do casco urbano. Serán medio millón de micro leds os encargados de dar luz e cor aos adornos máis aclamados e agardados do ano.
A empresa Electro Miño encargarase da instalación, que xa comezou na tarde do venres. Empregados de firma xa comezaron a visitar as diferentes rúas da capital estradense (e mesmo a casa consistorial) para garantir que os traballos poidan realizarse coa marxe suficiente para, nunha época na que estes traballos son moi intensos e simultáneos, chegar a tempo para a data oficial do acendido: o venres 5 de decembro.
O concelleiro Óscar Durán está á fronte desta ornamentación. Foi el mesmo o que concretou hoxe que serán un total de 116 arcos luminosos os que se instalarán nas diferentes rúas e aos que se sumarán outros 302 elementos de iluminación. Moitos deles estarán colocados en puntos como a Praza da Constitución, a Praza de Galicia, a Porta do Sol, Praza da Inmaculada, Praza da Feira ou Praza do Mercado, entre outros.
Avanzou de igual xeito a pretensión de que este ano distintos elementos ornamentais cheguen tamén a puntos como a alameda municipal, completando a estampa que conforma o palco da música, as árbores con grilandas de luces ou a propia fachada do consistorio ao fondo. Os motivos xa están escollidos.
“Seguimos apostando polo alumeado sen perder a cabeza”, apuntou Óscar Durán, que recoñeceu que o investimento se move, con leves variacións, nas cifras de anos anteriores. Con todo, o concelleiro asumiu que o alumeado de Nadal “é un reclamo indiscutible que favorece ao comercio e a hostalería da Estrada nunha das campañas máis importantes do ano”. “Non está no noso afán competir con ninguén, pero sabemos que hai xente que se despraza eses días ata A Estrada para gozar do alumeado”, indicou. Malia a contención, A Estrada incrementa tanto arcos como motivos luminosos con respecto ao 2024, no que foron 111 os arcos luminosos e 214 elementos de iluminación.
Os metros cadrados axudan a conformar esta comparativa: en 2025 serán 4.352 metros cadrados de iluminación, fronte aos 2.958 m2 do pasado Nadal.
A maior das árbores que se instalarán durante as festas no casco urbano estará na Praza da Constitución. Será visitable e de 13 metros de altura, conformando unha fermosa conxunto co consistorio estradense tamén engalanado con cortinas de luces e motivos propios desta festas. A maiores, un novidoso photocall con banco sumarse á composición, facilitando que os estradenses poidan configurar a súa propia postal de Nadal.
Acto de acendido
Como queda avanzado, o acendido do alumeado de Nadal realizarse o 5 de decembro. A idea que baralla o goberno local é darlle realce a este acto, buscando implicar nel aos máis pequenos. O Concello traballa na configuración dun programa lúdico que celebre nesa xornada a chegada do Nadal as rúas da vila. Os detalles daranse a coñecer en próximas datas.
Despois deste acendido, estas luces prenderanse cada día ás 18.30 horas, apagándose á medianoite durante a semana. Nas fins de semana manterase acendido ata as 03.00.
Recibe las noticias en tu correo.
