Arzúa volverá brillar na Semana Verde coa súa gastronomía, paisaxes e proxectos locais

“Este ano hai novidades porque por primeira vez vai ir Erica Mel, unha cooperativa arzuá fundada en 1990 por apicultores da AGA, agrupa a máis de 250 socios e produce uns 100.000 kg de mel ao ano, ademais de derivados innovadores. O seu nome honra á erica, planta melífera galega, e traballa con varias marcas, incluída a IXP-Mel de Galicia, ofrecendo tamén servizos de etiquetaxe.

Un dos pratos fortes será o showcooking a cargo de Diego Mato, recoñecido cociñeiro de Arzúa, quen se atopa a preparar a apertura do seu restaurante propio no outono, baixo o nome de Adeandré. “Vai facer pratos todos relacionados co queixo da Arzúa, cos produtos todos da Arzúa… incluso produtos da horta como porros”, explicou Begoña Balado, condelleira de Turismo..

A programación inclúe tamén a participación da EFA Piñeiral, quen elaborará tortiñas con queixo e verduras locais, así como degustacións de queixos por parte de Galmesán, Barral, Casa de Donicio e outros produtores. Ademais, contará coa presenza dos doces artesanais de Mamá Teresa, que ofrecerá as súas famosas tartas.

A feira servirá tamén como plataforma para impulsar a marca Arzúa Destino Verde, que busca poñer en valor os recursos naturais, as rutas de sendeirismo e a riqueza paisaxística da zona. “Temos movemento, non estamos parados en Arzúa. Estamos moi contentos de que unha vez máis Arzúa vai ser o centro”, comentou Balado.

Segundo destacou a edil de turismo, o stand do Concello de Arzúa foi “o centro de atención o ano pasado” grazas á súa dinamización e deseño atractivo. Este ano repetiremos presenza durante catro días, cun enfoque en “dar a coñecer, sobre todo, que Arzúa non é só Camiño de Santiago. Temos rutas, gastronomía, e somos o centro de Galicia”.

A presenza de Arzúa na Semana Verde confirma, unha vez máis, a súa aposta por combinar tradición e innovación para situarse como un referente do turismo galego.