Arzúa estará presente na 46ª edición da Feira Internacional de Turismo (FITUR), que se celebra do 21 ao 25 de xaneiro en Madrid, para promocionar o municipio como destino verde, sostible e de calidade.
Líder Redacción
20 de enero de 2026 a las 23:51
A concelleira de Turismo e presidenta da Mancomunidade de Concellos Galegos do Camiño Francés, Begoña Balado, desprazarase ata Madrid para manter diversas reunións con axencias de viaxes e operadores turísticos, co obxectivo de reforzar a presenza de Arzúa no mercado turístico e impulsar estratexias de difusión arredor da natureza, o territorio e o Camiño de Santiago.
Durante a súa estancia en Madrid, Balado tamén manterá unha reunión de traballo co Centro Galego en Madrid, co propósito de abrir vías de colaboración en torno á promoción do territorio e do destino Arzúa.
“Para Arzúa é fundamental estar en FITUR se queremos posicionarnos como un destino de turismo rural, sostible e de calidade. Queremos poñer o foco no noso destino verde e destacar aquilo que nos diferencia: a natureza, a gastronomía, o Camiño e o importante patrimonio que conserva o noso concello”, subliña Balado.
Arzúa centrará a súa promoción nos seus recursos naturais —con especial atención ás rutas de sendeirismo e cicloturismo e a espazos singulares como A Fervenza das Hortas—, así como na riqueza gastronómica do municipio e no Camiño de Santiago.
No marco da promoción gastronómica, tamén se poñerá en valor a Festa do Queixo, que celebrará a súa 51ª edición os días 27, 28 de febreiro e 1 de marzo, consolidada como unha das grandes citas gastronómicas de Galicia e un referente.
Balado destaca que “Arzúa acode a FITUR con obxectivos claros: dar visibilidade ao noso territorio, atraer visitantes e seguir construíndo un modelo turístico baseado na sustentabilidade, na identidade local e na experiencia auténtica para quen nos visita”.
Recibe las noticias en tu correo.
