Ames apostará pola creación dun teatro municipal para acoller actividades culturais de maior aforo

 

 

Nunha entrevista este luns en Radio Líder Santiago, o alcalde do concello máis transparente de Galicia, Blas García, compartiu importantes anuncios sobre a xestión municipal en Ames. Desde iniciativas innovadoras ata proxectos de desenvolvemento urbano e social, García delineou unha visión ambiciosa para o presente e futuro do municipio.

O socialista Blas García comezou a entrevista con Álvaro Veiga revelando unha nova medida de transparencia; a habilitación dun espazo na web municipal para que os grupos de oposición poidan publicar as súas novas. Esta iniciativa, segundo García, demostra o compromiso de Ames coas boas relacións entre o goberno e a oposición, destacando que poucos concellos en Galicia ofrecen esta oportunidade.

O rexedor asegurou que a xestión do Concello de Ames pasa a ser semellante a ter tres concellos nun, xa que «Bertamiráns ten uns dez mil habitantes e O Milladoiro outros dez mil, que xa farían dous bos concellos en Galicia, e despois está o rural cunha cifra similar», en total algo máis de 32.000 habitantes censados. O que hai anos era considerado como cidade dormitorio, especialmente O Milladoiro, converteuse con paso do tempo nun concello con vida propia que non para de medrar en poboación. O xerme deste cambio, segundo o alcalde, foi a implantación dun importante e necesario sistema de conciliación para as familias, onde acollerse á recollida temprana nos centros escolares ou os comedores, cun menú a cargo de nutricionistas e onde se aposta polo produto fresco e variado, servizos todos eles xestionados polo propio Concello, tendo aos fillos e fillas dende ás 7 de mañá a ata as cinco de tarde baixo a supervisión de distintos profesionais. Uns servizos que só se poden desfrutar, lembra, estando empadroado en Ames.

Un dos fitos significativos mencionados por García foi a creación de Augas de Ames, unha empresa encargada de xestionar o ciclo integral da auga no municipio. O alcalde informou que a empresa comezou as súas operacións o 1 de abril, absorvendo todo o persoal da empresa Espina y Delfín. Esta transición, subliñou García, é parte dun plan integral para mellorar os servizos de auga, incluíndo a expansión da rede de abastecemento a áreas rurais que carecen deste servizo esencial.

Outro punto clave abordado polo alcalde foi a humanización do Milladoiro unha zona afectada por un alto fluxo de tráfico. O rexedor socialista expresou o desexo dos residentes de ver unha redución significativa no tráfico, destacando os esforzos xa realizados para mitigar o impacto, como a desviación de camións pesados. «As 2000 persoas que viven en Rosalía de Castro están desexando que retiremos os 25-30 mil vehículos que pasan a diario polo Milladoiro», asegura. Ademais, enfatizou a importancia de colaborar con outras entidades, incluída a Xunta de Galicia, para atopar solucións efectivas e sostibles a este desafío.

No ámbito cultural, García revelou plans para a construción dun teatro no municipio, destinado a aumentar a oferta cultural e ofrecer un espazo para eventos de maior aforo. Tamén anunciou a organización dun concurso de monólogos para o próximo mes de maio, como parte dunha serie de actividades culturais planificadas para enriquecer a vida comunitaria de Ames.

Ademais dos proxectos específicos, o alcalde destacou o compromiso do Concello de Ames coa mellora continua dos servizos municipais, incluída a atención á saúde mental. Nese sentido, adiantou que este mércores 17 de abril se presentará un innovador Plan de Saúde Mental, deseñado para brindar apoio as persoas e establecer un sistema de detección precoz e acompañamento integral.

Na recta final, o alcalde descartou a posibilidade de fusionar o seu concello con outros municipios limítrofes. Un formato que, confesa, «non lle gusta» xa que iso suporía unha perda da identidade para moitos veciños. En vez diso, aboga pola mancomunidade de servizos como unha alternativa máis viable e beneficiosa para a cidadanía, permitindo manter a autonomía e singularidade de cada localidade.

A entrevista completa no seguinte enlace.