A Consellería de Vivenda e Planificación de Infraestruturas, a través do Instituto Galego da Vivenda e Solo (IGVS), vén de poñer en marcha o procedemento para a adxudicación de 60 vivendas de promoción pública (VPP) en réxime de alugueiro accesible na cidade de Santiago.
Líder Redacción
2 de mayo de 2025 a las 13:10
Os novos fogares están repartidos en tres inmobles situados nos barrios do Castiñeiriño e Lamas de Abade. A Xunta investiu máis de 12,3 millóns de euros nestes edificios, dos cales 3 millóns proceden de fondos europeos.
En concreto, un dos inmobles está situado na rúa Castiñeiriño 81 e conta con 24 vivendas, das que 9 estarán reservadas para menores de 36 anos e unha será adaptada para persoas con mobilidade reducida. O segundo edificio atópase na rúa Virxe Branca s/n, en Lamas de Abade, tamén con 24 vivendas, das que outras 9 se destinarán a menores de 36 anos e unha será adaptada. O terceiro edificio, situado na rúa Constantino Limia Nogueira s/n, tamén en Lamas de Abade, disporá de 12 vivendas, das que 5 serán para menores de 36 anos.
A Comisión Provincial de Vivenda da Coruña acordou a celebración dun sorteo público o vindeiro 16 de maio. Poderán participar nel todas as persoas demandantes inscritas no Rexistro de Demandantes de Vivenda de Galicia que teñan a Santiago como concello preferente na data da publicación do inicio do procedemento no Diario Oficial de Galicia.
As vivendas adxudicaranse en réxime de alugueiro a persoas con ingresos de entre 0,7 e 3 veces o IPREM. Unha vez realizado o sorteo, a listaxe provisional de adxudicatarios publicarase nos taboleiros de anuncios do Concello de Santiago e do IGVS, así como na súa páxina web. A partir dese momento, abrirase un prazo de 10 días para presentar reclamacións.
Recibe las noticias en tu correo.
