A cativada será a gran protagonista do Nadal no Concello do Pino
Líder Redacción
12 de diciembre de 2023 a las 14:08
Líder Redacción
12 de diciembre de 2023 a las 14:08
O Pino. 12.12-2023.- Tralo acendido das luces de Nadal o pasado martes 5 de decembro, o Concello do Pino comezará a desenvolver esta vindeira fin de semana unha programación especial con actividades e espectáculos para toda a veciñanza e coa cativada como gran protagonista.
As citas comezarán o sábado 16 de decembro, a partir das 16.30 horas, coa quinta edición da Festa do Nadal. Unha carpa instalada na praza do Concello e que contará cun disparador de confeti será o escenario da celebración dunha gran troula chea de música, divertidos xogos en familia e diferentes obradoiros con temáticas vencelladas a estas festas. Ademais, o alumnado de 4º da ESO do Pino aproveitará a celebración para instalar un posto con lambetadas, doces e chocolate quente para recadar fondos para a excursión de fin de curso.
E, como peche desta divertida tarde, a cativada poderá desfrutar do espectáculo ‘O Apalpador conta con vós’ para coñecer máis de preto a esta personaxe mítica da tradición galega. Grazas a esta peza de narración oral a cargo de Caxoto Contacontos, as persoas asistentes poderán coñecer cal é a orixe do Apalpador, a que se dedica no seu día a día e os que consellos hai que seguir para que cando nos visite nos deixe unha presada de castañas e algún dos agasallos que el mesmo constrúe.
Ao día seguinte, domingo 17 de decembro, a diversión trasládase á Casa de Cultura. Alí, e e partir das 18.00 horas, Malasombra Producións representará ‘Os fabulosos cleaners’, un espectáculo moi visual con pompas de xabón no que poderá participar toda a familia.
O público gozará con estas máxicas pompas transparentes con fume, con vapor, de todos os tamaños e estáticas ou voando polo escenario, que o transportará por un mundo máxico, cheo de cor e de moito humor.
Visita de Papá Noel
Haberá que agardar ata o mércores 20 para que a cativada desfrute dun dos días máis máxicos coa visita do Papá Noel aos centros educativos do Pino para recoller as cartas dos nenos e nenas da escola infantil A Galiña Azul, da escola unitaria de Gonzar, e do alumnado de Educación Infantil e dos primeiros cursos de Primaria do CPI Camiño de Santiago.
Concerto e exposición
A programación de Nadal inclúe tamén o sábado 30 de decembro o tradicional Concerto de Nadal a cargo da Banda Municipal de Arca. A cita está fixada para as 19.00 horas.
Así mesmo, e durante toda a segunda quincena de decembro, a Casa da Cultura acollerá a exposición ‘Bailarinas’, unha selección de acuarelas de Cristina Corral Vázquez. A mostra estará aberta entre as 10.30 a as 17.30 horas de luns a venres.
Nadal benéfico
Como cada ano por estas datas, o Concello do Pino organiza unha recollida de alimentos e produtos de hixiene e limpeza para repartir entre as persoas que máis o necesiten no municipio. As doazóns poden depositarse ata o 31 de xaneiro no centro sociocultural Luis Seoane e os supermercados Dia, Eroski e Onda.
Todas a persoas que queiran colaborar poderán facelo con alimentos non perecedoiros como latas de atún, sardiñas, mexillóns, millo, cogomelos, melocotóns…; botes de alcachofas, espárragos, xudías, chícharos, fabas, garavanzos, lentellas, pementos, grelos, acelgas…; tarros de paté, marmeladas, mel…; papas para bebés; azucre, café, cereais, galletas, cacao, leite en pó, leite condensado…; sobres de froitos secos ou deshidratados; sal, vinagre, aceite, especias; fariña, pasta, arroz, legumes, cuscús; sopa en sobres, purés…; envases de leite e zumes.
Tamén poden aportar produtos de limpeza e hixiene persoal, tales como lixivia, xabón para a louza, deterxente, limpador do chan…; pasta dentrífica, cepillos de dentes, xel de baño, champú, pastillas de xabón, desodorantes, locións, coitelas de afeitar…; papel hixiénico, papel de cociña, panos de papel, compresas, tampóns, cueiros…
Recibe las noticias en tu correo.
