Silleda, capricho da natureza e futuro da xente nova
A alcaldesa de Silleda, Paula Fernández Pena, abordou nunha entrevista en Radio Líder Santiago diversos temas de interese para o municipio, destacando o seu enfoque en políticas sociais e ambientais. Ao inicio, salientou a importancia da solidariedade da cidadanía ante a recente traxedia en Valencia, onde Silleda participou activamente na recollida de alimentos e material de primeira necesidade, en colaboración con outros concellos. “Veño rota de cargar caixas, pero orgullosa do meu pobo,” afirmou, recoñecendo o traballo de todos os veciños e veciñas de Silleda.
Líder Redacción
6 de noviembre de 2024 a las 19:03
En canto aos retos para a nova lexislatura, a alcaldesa explicou que o lema é “Construír a Silleda da xente,” co obxectivo de mellorar a calidade de vida mediante iniciativas en mobilidade e infraestruturas. Explicou que están a traballar para crear un concello con mobilidade amable e segura para os peóns. Actualmente, están en marcha obras de semi-peatonalización no centro da Bandeira, un proxecto que inclúe espazos para o lecer infantil, así como melloras nos accesos aos centros educativos e deportivos. Fernández Pena destacou que “queremos que as persoas ocupen o centro dos nosos espazos públicos, por riba dos coches.”
Outro tema prioritario para a alcaldesa é o compromiso do concello coa saúde mental. Silleda lanzou recentemente un programa pioneiro, que conta cun equipo de apoio e unha psicóloga municipal. “A soidade non desexada é un dos factores máis críticos para a saúde mental, e en Silleda queremos loitar contra iso,” destacou, subliñando o traballo en colaboración coa Consellería de Sanidade para abordar tamén os problemas de adiccións.
Fernández Pena resaltou, ademais, o recoñecemento do municipio coa bandeira verde, un distintivo que identifica aos concellos comprometidos co medioambiente. “A axenda 2030 permitirá construír a Silleda que queremos entre todos,” explicou a alcaldesa, quen tamén avanzou os plans de eficiencia enerxética e o uso de pellets como fonte de calefacción comunitaria.
Finalmente, a alcaldesa tamén destacou o proxecto de construción dunha piscina municipal, unha promesa pendente dende o seu primeiro mandato, e anunciou que se están a poñer os cimentos grazas á obtención de fondos europeos. “Para min é un debe cos veciños de Silleda, e espero que sexa unha realidade pronto,” subliñou.
Tes a entrevista completa no seguinte enlace.
