Hai noites que marcan un antes e un despois. A deste sábado no Multiusos Fontes do Sar foi unha ddelas. The Rapants non só encheron o recinto —arredor de 6.000 persoas—, senón que o converteron nunha celebración colectiva, nunha desas citas que explican por si soas por que unha banda deixa de ser promesa para se converter en fenómeno.
Líder Redacción
29 de marzo de 2026 a las 13:44
Dende ben cedo, o ambiente xa anunciaba algo grande. Filas, camisetas, grupos de amigos e esa electricidade previa que só acompaña ás grandes ocasións. O concerto de apertura correu a cargo de Ulex, que quentaron motores antes de que o Sar estoupase definitivamente coa saída dos de Muros.
E estoupou.
Porque o de The Rapants non foi só un concerto: foi unha festa continua, un diálogo constante cun público que cantou, saltou e acompañou cada tema coma se fose un himno. A banda respondeu cunha posta en escena sólida e directa, sen artificios innecesarios, apoiada nun repertorio que xa forma parte da banda sonora dunha xeración.
O cheo no Sar non chega por casualidade. É o resultado dunha traxectoria que leva anos medrando a base de concertos, discos e conexión coa xente. Xa no Son do Camiño deixaran clara a súa forza: a pesar dunha hora de actuación temperá, lograron reunir a milleiros de seguidores e encher o foso, algo reservado a poucos.
A súa capacidade de convocatoria xa quedara patente tamén en salas: as entradas para os seus concertos na Sala Capitol esgotáronse en tan só quince minutos, anticipando o salto a recintos de maior capacidade.
A confirmación chegou no verán de 2025, cando inauguraron o ciclo Atardecer no Gaiás na Cidade da Cultura de Galicia. Aquel concerto gratuíto colapsou os accesos e reuniu máis de 3.000 persoas nunha praza central completamente tomada polo público. Era xa evidente que o fenómeno ía en serio.
O salto ao Sar, con todo, supón outro nivel.
Co seu novo disco, Rapants Club, The Rapants consolidan un son recoñecible e unha proposta que bebe do indie, do disco e dunha actitude despreocupada que conecta directamente coa mocidade. Non hai pose: hai naturalidade, ritmo e unha enerxía que se transmite sen filtros.
A noite contou ademais coa presenza de convidados como Galician Army, Grande Amore, Sara Faro, Antía Ameixeiras e 9Louro, sumando capas a un espectáculo xa de por si intenso.
Fóra do escenario, o dispositivo especial de transporte facilitou unha saída ordenada, pechando unha noite redonda tamén no organizativo.
Pero o importante quedou dentro.
Porque máis alá das cifras, o que se viviu no Sar foi a confirmación dun momento. O instante no que unha banda deixa de medrar para, simplemente, estar arriba.
E agora mesmo, en Galicia, ese lugar ten nome propio: The Rapants.
Recibe las noticias en tu correo.
