O cambio de postura das concelleiras non adscritas no Concello de Santiago de Compostela marcou de forma decisiva a aprobación dos orzamentos municipais para 2026, tras pasar en apenas 24 horas da abstención ao apoio sen que mediase unha explicación pública clara nin modificacións relevantes no documento.
Líder Redacción
26 de marzo de 2026 a las 20:59
Este xiro inesperado foi duramente criticado por UCIN Santiago, que cualificou a situación como un “auténtico teatro político” e puxo o foco na falta de coherencia e transparencia no proceso. A formación cuestiona abertamente que motivou esta mudanza repentina: “Que cambiou en 24 horas? Que negociacións se produciron?”, preguntan, advertindo de que a cidadanía merece respostas claras.
Mentres tanto, o PSOE mantivo a súa abstención, unha decisión que UCIN interpreta como unha mostra de “indefinición política” nun momento clave para a cidade.
A pesar de recoñecer a necesidade de contar cun orzamento aprobado, UCIN considera que o documento presenta “carencias importantes” e carece da ambición necesaria para afrontar os retos de Santiago. Segundo sinalan, este tipo de movementos políticos de última hora contribúen a aumentar a desconfianza cidadá cara ás institucións.
A formación insiste en que os orzamentos municipais son unha ferramenta clave para definir o modelo de cidade e reclama que a súa elaboración se basee nun “diálogo real, transparencia e responsabilidade”, afastado de decisións tácticas.
UCIN Santiago reafirma así o seu compromiso cunha política centrada nas necesidades reais da veciñanza, fronte ao que consideran prácticas afastadas da realidade social.
Recibe las noticias en tu correo.
