Educación e o Concello de Frades avalían actuacións para mellorar o colexio de Ponte Carreira

Dende o Concello solicitaron melloras no illamento da fachada da instalación e a eliminación de humidades

7 de abril de 2025.- O conselleiro de Educación, Ciencia, Universidades e Formación Profesional, Román Rodríguez, reuniuse co alcalde de Frades, Roberto Rey, para avaliar o estado do Colexio Público Integrado CPI de Ponte Carreira e concretar novas actuacións de mellora. No encontro, no que tamén participou o concelleiro de Educación, Manuel Ferreiro, analizáronse intervencións ao abeiro do Plan de nova arquitectura pedagóxica, a estratexia da Xunta para modernizar os centros e adaptalos ás necesidades actuais do ensino.

Neste caso, Roberto Rey e Manuel Ferreiro fixeron fincapé na necesidade de mellorar o illamento térmico do centro escolar, a través dunha intervención nas fachadas de ambos os dous edificios así como a reparación dalgunhas humidades. Compre lembrar que a Xunta leva investido máis de 550.000 euros neste colexio, que recentemente celebrou o seu 50 aniversario, co fin de garantir que o centro sexa para os case 140 alumnos un espazo educativo accesible, eficiente e adaptado ás novas metodoloxías.

Nese sentido, tanto o Goberno galego como o Concello coincidiron na importancia de seguir avanzando en actuacións que permitan ofrecer unha educación de calidade, coa colaboración entre institucións como ferramenta clave para atender as necesidades da comunidade educativa.