Catuxa Salom: «No rural non todo son vacas e pandeiretas, e na música do rural non todo é tradi»

• • A artista galego-arxentina reflexiona sobre o rural, presenta o seu disco «Caldo» e racha cos estereotipos nunha entrevista en Radio Líder Santiago

Catuxa Salom, cantante e compositora galega, compartiu nunha entrevista con Álvaro Veiga en Radio Líder Santiago unha visión renovada sobre o rural, a súa música e os desafíos sociais aos que se enfronta Galicia. Desde A Ulloa, onde reside actualmente, a artista presentou Cāldo, un disco que combina tradición e modernidade, mentres aborda temas como a desromantización do rural, os coidados comunitarios e a necesidade de compromiso social. Un traballo conceptual que fusiona música electrónica, instrumentos tradicionais e sons da natureza, explorando temas como a amizade, o amor propio e a liberdade.

Tras o EP Nunha aldea, que romantizaba o rural, Cāldo reflicte un espertar máis crú sobre a vida no campo, alonxada da idealización bucólica. «Cando vives nunha cidade, o rural parece idílico, cheo de natureza e tranquilidade, pero a realidade é máis complexa», afirmou. A artista destacou que, malia os desafíos, segue elixindo vivir no rural, valorando o apoio da comunidade: «O importante non é onde vives, senón a xente que te rodea».

Composto por nove pezas inspiradas na comarca da Ulloa, o álbum combina ritmos como muiñeira, afrobeat, drum and bass e dembow, utilizando instrumentos como o bombo legüero, guitarra, pandeireta e sintetizador. Catuxa mestura as súas raíces galegas e arxentinas para crear unha proposta única, enérxica e universal, feita para bailar e conectar co público.

Esta perspectiva reflíctese na súa música, que mestura sons tradicionais galegos con afrobeat, reguetón e electrónica. «Non todo son pandeiretas e gaitas. Encántannos as raves, os sintetizadores e os baixos potentes», comentou. E por iso que «na música do rural non todo é tradi».

Cāldo, como explica Catuxa, é unha homenaxe á cultura do coidado. «O caldo simboliza como coidamos á xente, é medicinal», asegurou. No disco, a artista transita entre o galego, o castelán, o francés e mesmo o ruso, reflectindo unha multiculturalidade que enriquece a súa obra. «Non vou ser infiel a min mesma; cando falo de emocións moi profundas, saen en castelán, pero no rural onde vivo fálase 100% galego, e reivindícoo».

Durante a entrevista, Catuxa tamén fixo fincapé no impacto dos proxectos industriais no rural, referíndose especificamente ao caso de Altri: «Non creo no discurso de que vai traer traballo. Vai xerar máis despoboamento e afectará as nosas augas e recursos naturais». Salom participou en mobilizacións masivas contra este proxecto e subliñou a importancia de actuar con conciencia: «Todo é político, pero hai que ir máis alá dos partidos».

https://www.youtube.com/watch?v=Hpy3Y1pmFpc&ab_channel=CatuxaSalomVEVO

A artista anunciou unha ambiciosa xira que a levará por Galicia, España e Europa a partir de 2025. Os seus concertos combinarán música, performance e visuais, ofrecendo o que define como «unha viaxe sonora». A súa aposta pola innovación e a autenticidade reforzan o seu lugar como unha das voces emerxentes máis prometedoras da escena galega.

Con máis de 100 concertos realizados en dous anos e unha traxectoria que comezou en 2021 tras a pandemia, Catuxa Salom consolidouse como unha das grandes revelacións musicais de Galicia. «Non hai outra opción que seguir mellorando e dar todo de min», confesou.

Tes a entrevista completa, no seguinte enlace.