Atención Santiago: últimos días para votar nos Orzamentos Participativos de Xuventude
O próximo luns, 24 de marzo, remata o prazo para votar nos Orzamentos Participativos na área de Xuventude, nos que os mozos e mozas poden decidir o destino de 100.000 euros do presuposto municipal. A concelleira de Dereitos e Servizos Sociais, Promoción Económica e Xuventude, María Rozas, fixo unha chamada á participación, para elixir entre o máis dun cento de propostas presentadas nesta edición do programa Compostela Decide.
Líder Redacción
20 de marzo de 2025 a las 20:01
Na fase de propostas dos Orzamentos Participativos de Xuventude recolléronse un total de 179 suxestións, das que foron validadas as 159 que cumprían os requisitos técnicos ou que non foron retiradas polas persoas propoñentes. As propostas similares foron agrupadas, de maneira que finalmente son 103 as sometidas a votación, agrupadas en dez áreas temáticas diferentes: deporte, música, cine e sector audiovisual, outras disciplinas artísticas, gastronomía, ciencia, tecnoloxía e saberes; medio ambienbte e saúde, animais, igualdade, diversidades e sexualidade; inclusión social e emprendemento, emprego e economía circular. A concelleira María Rozas destacou a variedade das propostas, “que racha cos estereotipos sobre a mocidade e demostra que os mozos e mozas teñen moitos e moi variados intereses, unha gran consciencia social, e ganas de participar na vida pública”.
Procedemento de votación
Na fase de votación dos Orzamentos Participativos de Xuventude poderán participar os mozos e mozas nacidos entre 1995 e 2009, que estean censadas en Santiago ou que acrediten que estudan ou traballan en Compostela. As persoas que participen no proceso, a través da web decide.santiagodecompostela.gal, deberán seleccionar obrigatoriamente tres propostas distintas, e puntualas con 3, 2 ou 1 punto, segundo o grao de preferencia. O prazo de votación rematará o 24 de marzo. Ademais, véñense habilitando puntos de votación presencial en diferentes espazos vinculados á Universidade de Santiago.
O departamento de Mocidade executará as propostas máis votadas, ata completar o orzamento de 100.000 euros asignado aos Orzamentos Participativos. Na edición anterior puideron desenvolverse un total de dez propostas.
