Amaramar, un proxecto musical nacido tras unha furgoneta avariada e unha paixón polo mar

• A banda é a gañadora da segunda convocatoria de Onda Chicha, unha iniciativa de Radio Líder Santiago e Chichalovers para apoiar e dar visibilidade ao talento musical emerxente galego, coa colaboración de Quincemil e Arde Música

A historia de Amaramar está intimamente ligada a Galicia e ao seu mar. A banda, gañadora da segunda convocatoria de Onda Chicha, foi protagonista nos micrófonos de Radio Líder Santiago nunha entrevista na que o seu vocalista e compositor, Enric Pellicer, compartiu a orixe e a identidade dun proxecto musical nacido dun cambio vital decisivo.

Formada en 2024 por Enric, Roy, Darío e Julia, Amaramar xorde a partir da chegada de Enric a Galicia desde Barcelona, nunha viaxe persoal marcada pola incerteza. Aquel desprazamento acabou converténdose nun punto de inflexión cando unha avaría na súa furgoneta o levou a quedar en Galicia. “Cheguei a Galicia, rompeuse a furgoneta e decidín quedar; aquí atopei o que para min é o paraíso da miña vida”, relatou durante a entrevista.

Tras quedar en Galicia, Enric contou que comezou a compoñer cancións cun estilo máis próximo ao rock indie, un xénero que sempre lle gustara. Cando viu que ese material tiña forma, decidiu buscar xente para poder presentalo e compartilo, e foi así como, pouco a pouco, acabou tomando forma Amaramar xunto a Roy, Darío e Julia.

O mar como identidade creativa

O vínculo coa costa galega converteuse no eixo central do proxecto. O nome da banda, Amaramar, resume esa relación constante co mar como espazo físico e emocional. “A nosa música vén representar ese mar galego: ás veces bravo, ás veces en calma, con subidas e baixadas”, explicou Enric.

Dese proceso vital nace O mar, o primeiro álbum de Amaramar, publicado o pasado mes de outubro. Trátase dun traballo gravado de maneira totalmente artesanal, na casa, con medios moi limitados. “Todo o disco está gravado no meu cuarto, cun micrófono moi sinxelo; quería que as cancións chegasen á pel”, sinalou o músico.

A relación co mar é tamén un elemento común para os catro integrantes da banda. Tal e como contou Enric, todos manteñen unha conexión directa e cotiá con el, xa sexa a través do traballo, do surf ou da súa forma de vida. Esa presenza constante reflíctese tanto no nome do grupo como no seu primeiro disco e na maneira de entender a música. “A nosa música vén representar ese mar galego: ás veces bravo, ás veces en calma, con subidas e baixadas”, explicou Enric.

Musicalmente, Amaramar móvese entre o rock indie e o pop, cunha sonoridade luminosa que contrasta cun fondo emocional intenso. “Facemos cancións que soan alegres, pero detrás hai moita dor; para min a dor tamén é unha forma de aprender e madurar”, recoñeceu.

De cara ao futuro, Amaramar xa traballa en novas composicións e non descarta incorporar o galego ás súas próximas cancións como mostra do vínculo coa terra. “Síntome moi unido a esta cultura e gustaríame facer algo que estea ligado á vosa terra”, concluíu.

Durante a entrevista, Enric destacou o bo momento que vive a música en Galicia e o ambiente de colaboración entre artistas. “En Galicia hai unha rede moi bonita entre a xente que se dedica á música”, explicou, subliñando que os músicos se axudan e colaboran entre si. Nese sentido, comparou esta realidade coa doutras cidades nas que viviu e recoñeceu que “é algo que eu non vivín nunca en Barcelona”. Para Enric, este clima de cooperación está a favorecer a aparición de novos proxectos e a consolidación dunha escena musical viva e diversa.

O impulso de Onda Chicha e o futuro

Un dos temas máis significativos do disco é Respirar, unha canción que aborda a ansiedade e a depresión e que se converteu nun dos momentos máis recoñecibles dos concertos da banda. “É unha das cancións que máis conecta coa xente; cando rematamos os directos sempre nos falan dela”, contou Enric.

O recoñecemento como banda gañadora da segunda convocatoria de Onda Chicha supuxo un paso clave para Amaramar. “Cando me dixeron que gañaramos foi un soño; poder estar aquí, en Radio Líder, e sentir que o proxecto comeza a medrar é algo moi especial”, lembrou.

Onda Chicha é unha iniciativa organizada por Radio Líder Santiago e Chichalovers, coa colaboración de Quincemil e Arde Música, creada para apoiar e dar visibilidade ás bandas e artistas emerxentes de Galicia. O programa inclúe entrevistas en Radio Líder Santiago e Quincemil, a gravación dun tema en Chichalovers da man de Arde Música , difusión en medios e a posibilidade de participar no ChichaFest, que se celebrará na Sala Capitol o 13 de xuño 2026.

Lisdexia foi a banda gañadora da primeria convocatoria. O prazo de inscrición para a terceira convocatoria de Onda Chicha xa está aberto, ofrecendo unha nova oportunidade para que bandas e artistas emerxentes galegos poidan dar a coñecer o seu proxecto e formar parte desta iniciativa de impulso á música feita en Galicia. Podes consultar as bases aquí.