ACOUGO celebrará en Santiago un encontro solidario para apoiar a infancia e o acollemento familiar
• O evento terá lugar o próximo 27 de maio no Hotel Puerta del Camino de Santiago de Compostela.
• A iniciativa celebrarase en datas próximas ao Día Mundial do Acollemento Familiar, que se conmemora o 31 de maio.
Líder Redacción
26 de mayo de 2026 a las 13:05
A Asociación Galega de Familias de Acollida, ACOUGO, organizará o próximo 27 de maio o encontro solidario “Un parrulo, moitas historias”, unha proposta pensada para desfrutar en familia e, ao mesmo tempo, apoiar os programas de infancia, adolescencia e acollemento familiar que a entidade desenvolve en Galicia.
O evento celebrarase no Hotel Oca Puerta del Camino de Santiago de Compostela, en horario de 18:00 a 20:00 horas, e contará cun programa dirixido ás familias e á infancia no que haberá merenda, contacontos, obradoiros creativos e espazos de encontro e convivencia.
A iniciativa enmárcase ademais nas datas próximas ao 31 de maio, Día Mundial do Acollemento Familiar, unha xornada dedicada a visibilizar a importancia de que nenos, nenas e adolescentes poidan medrar nun entorno familiar seguro, estable e afectivo.
Baixo o lema “Un parrulo, moitas historias”, ACOUGO busca crear un espazo de sensibilización social arredor da realidade do acollemento familiar, promovendo tamén a participación cidadá e o compromiso colectivo coa infancia.
Toda a recadación do evento destinarase integramente aos programas de apoio á infancia, adolescencia e acollemento familiar que a entidade desenvolve en Galicia.
As persoas interesadas poden adquirir as entradas e colaborar tamén a través da fila 0 na seguinte ligazón: https://www.tomaticket.es/index.php?accion=evento&IdEvento=961090
ACOUGO anima ás familias, entidades e cidadanía a sumarse a esta iniciativa solidaria que pretende converter unha tarde de encontro nunha oportunidade para seguir construíndo redes de apoio arredor da infancia.
