20/05/2024 Un ano máis, os mozos e mozas de entre 14 e 17 anos teñen a oportunidade de participar nun campamento de verán de surf no concello de Oleiros, grazas ao programa organizado pola Concellaría de Dereitos e Servizos Sociais, Promoción Económica e Xuventude. A actividade desenvolverase do 1 ao 8 de xullo, e o prazo para presentar as solicitudes estará aberto desde hoxe, 20 de maio, ata o 3 de xuño.
Líder Redacción
20 de mayo de 2024 a las 16:10
O campamento de verán de surf é unha actividade organizada desde o Departamento de Mocidade co obxectivo de facilitar a conciliación familiar nas vacacións de verán, cunha oferta de ocio alternativo e saúdable que, ao tempo, favorece o coñecemento do patrimonio natural de Galicia e fomenta a convivencia entre os mozos e mozas. O programa terá lugar do 1 ao 8 de xullo no albergue de Santa Cruz de Oleiros, e ademais de surf, están previstas outras actividades deportivas como sendeirismo ou snorquel.
Prazos de inscrición e requisitos
O campamento de verán de surf está dirixido a mozos e mozas empadroadas no Concello de Santiago, con idades comprendidas entre os 14 e os 17 anos prioritariamente, xa que no caso de quedar prazas vacantes atenderíanse outras solicitudes. Ofértanse 26 prazas, tres delas reservadas para persoas derivadas desde o departamento de Servizos Sociais. No caso de existir máis demanda que prazas, farase un sorteo público, e no caso de solicitudes de varios irmáns, se un deles obtén a praza adxudicaráselle directamente aos outros para garantir a conciliación familiar (agás se trate da última praza a adxudicar no sorteo).
O prazo de preinscrición estará aberto desde hoxe, 20 de maio, ata o 3 de xuño. O prezo da actividade será de 120 euros. A cota quedará en 100 euros no caso de segundos irmáns e de familias numerosas; e aplicarase un desconto do 100% para as participantes que proveñan de familias en risco de exclusión social, previo informe do departamento de Servizos Sociais. Os pagos deberán realizarse antes do 20 de xuño.
A solicitude de preinscrición deberá facerse na sede electrónica do Concello de Santiago a través do trámite ‘Preinscrición en campamentos para a mocidade’ e empregando o modelo MC005, ou ben de forma presencial no Rexistro Xeral do Concello de Santiago (rúa Presidente Salvador Allende). No caso de presentar a instancia noutro rexistro ou por correos, é preciso informar desta circunstancia, enviando un correo electrónico a dptoxuventude@santiagodecompostela.gal.
Recibe las noticias en tu correo.
