UCIN Galicia prepara unha mobilización cidadá para denunciar a “parálise institucional” en Santiago
UCIN Galicia vén de poñer en marcha un movemento de contacto directo coa cidadanía e co tecido asociativo compostelán ante o que cualifica como unha “situación de parálise institucional e social” no Concello de Santiago. A formación está a manter reunións con asociacións veciñais, entidades civís e representantes das Forzas e Corpos de Seguridade do Estado para recompilar preocupacións e propostas fronte á falta de resposta do actual goberno local.
Líder Redacción
5 de diciembre de 2025 a las 11:53
O coordinador de UCIN Galicia, José Luis Calo, subliña que o obxectivo desta iniciativa é claro: “Santiago necesita solucións reais. A prioridade é sumar, escoitar e crear espazos de colaboración que permitan desbloquear a cidade. Non se trata de ideoloxías, senón do benestar dos veciños”.
Na mesma liña, o responsable de UCIN Santiago, Diego Adrián Mallo, advertiu da gravidade do momento actual: “Estamos nun punto decisivo. Non podemos quedar mirando mentres os problemas medran nos barrios. Queremos implicar a toda a cidadanía para construír unha cidade máis segura, limpa e funcional”.
Segundo UCIN Galicia, as reunións mantidas estes días amosan un malestar crecente pola falta de xestión municipal en áreas como a seguridade, a convivencia, a mobilidade e o mantemento dos barrios. Tanto asociacións como residentes coinciden na necesidade de recuperar un diálogo estable co Concello e de reforzar a atención aos problemas do día a día.
Tras esta ronda de contactos, UCIN Galicia anunciou que impulsará nos próximos días unha mobilización aberta a todos os composteláns e colectivos sociais. A formación chama á unidade e á participación activa da cidadanía para reclamar “institucións próximas, eficaces e responsables”.
“Só coa forza conxunta dos nosos veciños poderemos esixir as solucións que Santiago merece”, afirmou Calo, quen insistiu en que a mobilización será pacífica e construtiva.
UCIN Galicia anima ás entidades sociais, culturais e veciñais a seguir a información a través dos seus canais oficiais e a participar no proceso de escoita que están a desenvolver.
