Silvia Intxaurrondo presenta a súa primeira novela no Hotel Araguaney este venres
A xornalista, unha das caras máis recoñecidas da actualidade na TVE, visitará Compostela o venres 30 de xaneiro para presentar a súa primeira novela nun acto no Hotel Araguaney xunto a Jesús A. Núñez Villaverde.
Líder Redacción
27 de enero de 2026 a las 15:37
Silvia Intxaurrondo chega a Santiago convidada pola Fundación Araguaney nun momento de gran proxección mediática, á fronte de La Hora de La 1, o programa matinal de entrevistas, debate e análise da actualidade política e social de Televisión Española.
O encontro terá lugar ás 19:30 horas no Salón Olivo do Hotel Araguaney e o acceso ao acto será de balde, previa confirmación de asistencia no correo info@fundacionaraguaney.org.
Ademais da presentación literaria, o evento destaca polo diálogo entre Silvia Intxaurrondo e Jesús A. Núñez Villaverde, codirector do Instituto de Estudos sobre Conflitos e Acción Humanitaria (IECAH). Un intercambio que permitirá ampliar o foco da obra cara a unha lectura do panorama internacional actual, reflexionando sobre as inxustizas silenciadas, o papel do xornalismo, a memoria colectiva e a cultura como ferramentas de análise e transformación social.
A elección da Fundación Araguaney como escenario do acto responde á súa vocación como espazo de encontro entre culturas, de ruptura de prexuízos e de defensa do diálogo fronte ás inxustizas, valores que conectan directamente co espírito dunha novela que sitúa no centro ás voces historicamente caladas.
A presentación en Santiago enmárcase no percorrido de lanzamento impulsado pola Editorial HarperCollins, responsable da publicación de Solas en el silencio e unha das principais editoriais internacionais, cun catálogo comprometido coa diversidade de voces, a calidade literaria e a reflexión sobre os retos sociais contemporáneos.
Unha novela sobre o silencio e a resistencia
Solas en el silencio supón o debut narrativo de Silvia Intxaurrondo e foi acollido con interese tanto polo público lector como pola crítica. Ambientada en Sopuerta, unha vila do norte marcada pola chuvia miúda e o peso da tradición, a historia segue a Sole e ao seu fillo Joxean, un mozo cunha mente infantil, xunto a un grupo de mulleres atrapadas entre o medo, a culpa e os segredos.
A novela afonda en temas como a soidade, o silencio imposto, a violencia estrutural, o amor incondicional e as distintas formas de resistencia persoal e colectiva fronte a un destino aparentemente escrito de antemán.
Punto de venda e sinatura de exemplares
Durante o acto haberá un punto de venda do libro a cargo da libraría colaboradora Follas Novas e a autora asinará exemplares ao remate do encontro.
Con esta cita, Santiago de Compostela súmase ao percorrido de presentacións de Solas en el silencio, consolidando un evento que une literatura, pensamento crítico e diálogo internacional nun espazo comprometido coa cultura, os dereitos humanos e a memoria colectiva.
