Unha cadea de indisposicións entre efectivos da Policía Local de Santiago alterou este domingo pola mañá o funcionamento habitual do servizo, nunha xornada especialmente complexa para o tráfico debido á manifestación convocada na cidade.
Líder Redacción
14 de diciembre de 2025 a las 21:14
Segundo informou o Concello de Santiago, para a quenda da mañá estaba prevista a presenza de oito axentes. Porén, antes mesmo do inicio do servizo, tres policías comunicaron a súa indisposición e non puideron incorporarse aos seus postos. Pouco despois das 9.00 horas, outros dous efectivos tamén notificaron a súa indisposición e ausentáronse do servizo.
A situación complicouse aínda máis arredor das 10.00 horas, cando o policía encargado da Sala de Pantallas comunicou igualmente a súa indisposición, deixando sen cobertura directa este posto clave para a vixilancia do túnel do Hórreo.
Ante este escenario, e co obxectivo de evitar o peche do túnel nun día de especial dificultade para a circulación, o departamento municipal de Mobilidade decidiu recorrer á empresa concesionaria do mantemento da infraestrutura. Esta puido mobilizar persoal propio para garantir a vixilancia necesaria e manter operativo o túnel.
Desde Raxoi sublíñase que a medida permitiu asegurar a seguridade da infraestrutura e minimizar as afeccións ao tráfico nunha xornada xa marcada polas restricións e desvíos derivados da mobilización cidadá.
Recibe las noticias en tu correo.
