Paula Prado carga contra o goberno compostelán: “Hai máis preocupación pola ideoloxía que polos cidadáns”

• A secretaria xeral do PPdeG defende en Radio Líder Santiago a moción de censura lucense, avala o proxecto de Borja Verea para Compostela e acusa ao BNG de vivir “instalado no non a todo”

A secretaria xeral do PPdeG, Paula Prado, debuxou este martes en Radio Líder Santiago un escenario político no que o Partido Popular busca consolidar unha alternativa de goberno nas grandes cidades galegas. Nunha entrevista concedida ao programa conducido por Álvaro Veiga, Prado defendeu sen matices a moción de censura de Lugo, reivindicou a figura de Borja Verea en Santiago e cargou con dureza contra o BNG e o actual executivo compostelán.

A dirixente popular sostivo que o cambio de goberno en Lugo responde “á responsabilidade” do PP tras ser a forza máis votada nas eleccións municipais. “Se se nos presenta a oportunidade de gobernar Lugo, sería unha irresponsabilidade non facelo”, afirmou.

Prado argumentou que a cidade vivía unha situación de “inestabilidade” desde o comezo da lexislatura, agravada pola marcha da exalcaldesa Lara Méndez ao Parlamento galego. Segundo indicou, o executivo local estaba “máis centrado en cuestións partidistas que en resolver os problemas reais dos lucenses”.

A número dous dos populares galegos tamén saíu en defensa da edil que facilitou a operación política e negou o relato da oposición sobre un caso de transfuguismo. “Ela pensaba que podía facer cousas importantes por Lugo e o Partido Popular deulle esa oportunidade”, asegurou.

“Borja Verea será o mellor alcalde para Santiago”

A situación política compostelá ocupou outro dos grandes bloques da entrevista. Paula Prado confirmou o respaldo total da dirección popular a Borja Verea e asegurou que será o candidato do PP nas próximas eleccións municipais. “Borja Verea será o mellor alcalde que Santiago poida ter en moitos anos”, proclamou.

A secretaria xeral popular insistiu en que o líder da oposición coñece “perfectamente” os problemas da cidade grazas ao traballo desenvolvido nos barrios e nas parroquias. Ao mesmo tempo, criticou con dureza a xestión do goberno local encabezado polo BNG. “Mover un papel no Concello de Santiago é absolutamente imposible”, lamentou. “Hai máis preocupación pola ideoloxía que polos cidadáns”, incidiu.

Prado mesmo revelou que o PP chegou a explorar unha alternativa de goberno tras a ruptura do grupo socialista no Concello compostelán. “Borja Verea actuou con absoluta xenerosidade e chegou a propoñer que Mercedes Rosón fose alcaldesa”, sinalou.

Vivenda: “O problema máis grande que hai agora mesmo”

Durante a entrevista emitida en Radio Líder Santiago, Paula Prado tamén abordou a crise da vivenda, unha cuestión que definiu como “a maior preocupación social” da actualidade.

A responsable popular defendeu os plans da Xunta para construír vivenda pública en Santiago e puxo en valor o proxecto previsto na zona de Mallou. “O presidente Rueda está conectado cos problemas reais dos galegos e a vivenda é unha das súas grandes preocupacións”, indicou.

Sobre as expropiacións previstas para desenvolver ese ámbito urbanístico, pediu “responsabilidade” e confianza no proceso administrativo. “Ninguén vai recibir un prezo que non corresponda”, sostivo.

Ao mesmo tempo, responsabilizou ao Goberno central da falta de oferta residencial pola inseguridade xurídica derivada, ao seu xuízo, da actual lei estatal de vivenda.

Duras críticas ao BNG e á “turismofobia”

Nun ton especialmente crítico co nacionalismo, Paula Prado acusou ao BNG de converter a protesta “na súa única proposta política”. “O BNG non ten un proxecto de futuro para Galicia. Está en contra da industria, da enerxía e do desenvolvemento”, afirmou.

A secretaria xeral popular tamén cuestionou as mobilizacións impulsadas desde sectores nacionalistas e lamentou as protestas diante da sede do PP en Santiago. “Hai actitudes absolutamente antidemocráticas”, denunciou.

No tramo final da entrevista, Prado puxo o foco na situación turística de Compostela, alertando dunha perda de dinamismo derivada, segundo indicou, da política municipal. “Santiago leva tres anos instalado nunha política de turismofobia”, criticou.

A popular asegurou que o turismo é un motor económico transversal para toda a cidade e advertiu das consecuencias que pode ter a caída de visitantes sobre o comercio e o emprego local.