«O Victoria Feminino compite na mesma categoría ca o Compos, precisamos tamén o apoio da cidade»

• Isabel Vilaseco, nova membro da directiva do Victoria CF Feminino, repasou os logros do club e detallou os actos do décimo aniversario da sección, que inclúen unha gala, encontros interxeracionais e visitas a centros escolares.

Santiago de Compostela acolle estes días a celebración dos dez anos da creación da sección feminina do Victoria CF, unha das entidades deportivas con máis base en Galicia. Para conmemorar esta data, o club organiza unha serie de actos que inclúen mesas redondas, encontros interxeracionais, visitas a centros escolares e unha gala en decembro con exxogadoras e figuras relevantes do fútbol feminino.

En conversa con Isabel Vilaseco, nova integrante da directiva e nai de xogadores da base, quedou claro que este é un proxecto que medrou con paixón e compromiso. “As familias grandes precisan xestión interna. Ao final, se non podes con eles, únete”, comentou entre risas sobre o seu paso á directiva.

A evolución do club foi notable desde aquela tempada 2015-2016 na que arrancaron cun só equipo feminino. Hoxe, o Victoria conta con sete equipos femininos e máis de 130 licenzas, consolidándose como un referente na formación deportiva na cidade.

“O deporte é educación. É compromiso, igualdade e respecto”, subliñou Vilaseco, destacando tamén o convenio co departamento de psicoloxía da USC para traballar valores e saúde mental coa base.

Nova relacionada:

https://admin.vive.gal/o-victoria-fc-conmemora-dez-anos-da-sua-seccion-feminina-no-auditorio-de-galicia/

A nivel competitivo, o Victoria Fem mantense con forza na Liga Nacional, e segundo Isabel, “foi un crecemento constante coa aposta de facer un equipo estable”. Ademais, o club continúa reivindicando a necesidade de mellores infraestruturas deportivas na cidade. “Hai moitos clubes e poucos campos. A falta de espazos condiciona o adestramento e o rendemento”, sinalou.

Os actos do décimo aniversario comezaron cunha presentación oficial no Auditorio de Galicia, onde se revelou a nova equipación e o escudo conmemorativo. “Queremos achegarnos á cidadanía, ás escolas e tamén ás persoas maiores. Que todas vexan que o fútbol é para todas”, explicou.

No horizonte, unha gala en decembro homenaxeará a todas as mulleres que pasaron polo club, e incluso se prevé organizar un partido amistoso entre xogadoras do actual plantel e exxogadoras que militan en equipos como o Barça ou o Sporting de Xixón.

Isabel pechou a conversa cunha chamada ao público compostelá para que apoie ao equipo feminino: “O Victoria Fem compite a nivel nacional, na mesma categoría que a SD Compostela. Precisamos tamén do apoio da cidade”. A súa reflexión puxo sobre a mesa a invisibilidade que moitas veces sofre o deporte feminino, mesmo cando alcanza fitos comparables aos do masculino. “Non pedimos máis, pero tampouco menos. Só o mesmo apoio e presenza”, engadiu.