O Punto Limpo do Milladoiro recolleu en outubro 2.500 quilos de equipos electrónicos

• O centro de depósito de residuos do Punto Limpo rexistrou 607 entradas en outubro de 2023
• Durante o pasado mes destaca a achega de 2.456 quilogramos de lixo electrónico, 112 litros de aceites vexetais ou 72 quilogramos de pinturas
• O Punto Limpo, inaugurado en xaneiro de 2007, está situado na rúa das Hedras, no parque empresarial do Milladoiro, e abre de luns a sábado de 9:00 a 15:00 horas e de 16:00 a 20:00 horas

Ames, 30 de novembro de 2023.- O centro de depósito de residuos do Punto Limpo rexistrou 607 entradas en outubro de 2023. Durante o pasado mes destaca a achega de 2.456 quilogramos de lixo electrónico, 112 litros de aceites vexetais ou 72 quilogramos de pinturas. O Punto Limpo, inaugurado en xaneiro de 2007, está situado na rúa das Hedras, no parque empresarial do Milladoiro, e abre de luns a sábado de 9:00 a 15:00 horas e de 16:00 a 20:00 horas.

O número de veciñas e veciños que fan uso do Punto Limpo para depositar os seus residuos segue a aumentar, xa que cada vez somos máis conscientes do importante que é reciclar correctamente aqueles refugalos que non se poden depositar nos colectores convencionais.

Deste xeito, o pasado mes de outubro rexistráronse un total de 607 entradas no servizo municipal. Máis concretamente, a veciñanza amesá depositou 2.456 quilogramos de equipos eléctricos e electrónicos, 100 quilogramos (1 metro cúbico) de envases baleiros contaminados, 48 unidades de tubos fluorescentes e outras lámpadas, 120 quilogramos de pneumáticos fóra de uso (17 unidades), 51 quilogramos de baterías de chumbo (3 unidades), 3 metros cúbicos de roupa, 100 metros cúbicos de voluminosos e 11 quilogramos de pilas (arredor de 385 unidades).

Ademais, rexistrouse a entrada de 20 metros cúbicos de escombro, 30 metros cúbicos de plásticos, outros 30 metros cúbicos de metais, 72 quilogramos de pintura, 100 metros cúbicos de madeira, 9 metros cúbicos de papel e 42 unidades de aerosois. Cómpre destacar tamén o incremento nos aceites, 63 litros de aceite de motor e 112 litros de aceite vexetal.

Horario e teléfono de contacto do Punto Limpo

O Punto Limpo está situado na rúa das Hedras do polígono Novo Milladoiro e ata alí pode achegarse toda a veciñanza de Ames para desfacerse de aqueles obxectos e materiais que non van aos colectores convencionais de materiais orgánicos, inorgánicos, vidro ou papel. Recentemente, ampliou o seu horario, e ofrece os seus servizos de luns a sábado en horario de mañá e de tarde. Así, o Punto Limpo abre de 9:00 a 15:00 horas e de 16:00 a 20:00 horas, seis días á semana. As persoas que teñan calquera dúbida poden chamar ao teléfono 981 53 66 88.

Os voluminosos deben entregarse no Punto Limpo. Outra opción é chamar aos números de teléfono 981 19 12 40 ou 639 10 76 38, e acordar unha data e un lugar para depositalos xunto ao contedor máis próximo e que,posteriormente, sexan recollidos.

Punto limpo móbil

Por outra banda, o pasado mes de abril comezou a funcionar o Punto Limpo móbil. Trátase dun vehículo adaptado que percorre os diferentes lugares e parroquias de Ames, cuns horarios e puntos prefixados, normalmente ao carón das Casas da Cultura ou locais sociais de cada parroquia, co obxectivo de que a veciñanza poida depositar os pequenos residuos domésticos para os que non existen colectores na vía pública.

O vehículo consta dunha plataforma móbil que se abre en dúas metades deixando un corredor central desde o que se accede aos colectores específicos para cada tipo de residuo. Nel hai un operario para axudar a que todos os residuos se depositen no colector que lles corresponde.

Os residuos que se poden depositar no punto limpo son aerosois, aceite doméstico, baterías e acumuladores, CD, DVD, disquetes e casetes, cristal, xoguetes, lámpadas e fluorescentes, pequenos electrodomésticos electrónicos (televisores, microondas, ordenadores, etc.), pilas, pinturas e vernices, radiografías, roupa e calzado e teléfonos móbiles.