Santiago de Compostela, 3 de decembro de 2025.- O Grupo Municipal Socialista volveu reclamar hoxe unha intervención inmediata para reforzar os cadros de Bombeiros e Policía Local, alertando de que o executivo de Goretti Sanmartín continúa ignorando demandas laborais pendentes e evitando aplicar solucións que xa están ao seu alcance.
Líder Redacción
3 de diciembre de 2025 a las 23:34
A concelleira socialista Marta Abal acusou ao goberno municipal de “bloquear deliberadamente” a saída a esta crise, malia —subliñou— que existen vías legais, técnicas e operativas plenamente viables. “O Concello de Santiago só precisa ter vontade política, porque legalmente é posible”, afirmou.
Desde o PSdeG lamentaron que se estean desaproveitando oportunidades evidentes, como as 12 prazas que quedarán vacantes co traspaso da Unidade Municipal de Atención a Drogodependentes (UMAD) ao Sergas, e que poderían empregarse de inmediato para reforzar os servizos esenciais.
Tamén lembraron que continúan sen activarse as convocatorias xa aprobadas, e denunciaron que, despois de máis dun ano, “non consta ningún avance nin a publicación das prazas”. O grupo socialista puxo como exemplo outros concellos, como Ferrol, que xa están a aplicar solucións que Santiago podería replicar sen atrancos.
Abal e o portavoz Gumersindo Guinarte insistiron en que as reclamacións de bombeiros e policías contan con respaldo xurídico: “Hai xurisprudencia do Tribunal Superior de Xustiza que avala as nosas propostas, e hai solucións intermedias aplicadas noutros municipios, como o complemento específico singularizado”.
Acusaron ao executivo local de ignorar mecanismos dispoñibles para mellorar as condicións laborais e reforzar os equipos. “Que deixen de mirar para outro lado e que a alcaldesa asuma a dirección desta negociación”, reclamaron.
O PSdeG advertiu ademais de que a falta de persoal incumpre mínimos recollidos na normativa municipal: “O plan municipal de emerxencias establece que debe haber un mínimo de doce bombeiros; agora mesmo nin sequera se chega a cubrir catro por quenda”. Por iso insistiron en que o Concello non pode permitirse perder nin unha soa praza.
Os socialistas concluíron que o bloqueo non responde a motivos técnicos, xurídicos nin económicos, senón estritamente políticos: “As solucións existen, só hai que aplicalas”.
Recibe las noticias en tu correo.
