O PP denuncia a suspensión de actividades no Centro Sociocultural de Laraño polo seu abandono

• Instou ao goberno local “a licitar, canto antes, os contratos dos CSC, para rematar con esta precaria situación e os centros socioculturais poidan funcionar como é debido e os usuarios reciban os servizos que pagan”.

O Partido Popular de Santiago, a través do seu concelleiro José Ramón de la Fuente, denunciou que “o goberno nacionalista ten absolutamente esquecido o local social de Laraño, no que abundan, dende hai tempo, serias deficiencias que imposibilitan, incluso, a celebración das actividades normais dos usuarios, por exemplo, chegaron a suspenderse as clases de informática, porque os ordenadores levan todo o ano avariados”.

De la Fuente explicou que esta instalación ten moitas anomalías, como problemas de funcionamento de sistemas de climatización, o que levou, varias veces, á suspensión de actividades; falta de mantemento preventivo para atallar humidades evidentes nas salas de reunións; e unha limpeza dimensionada ás necesidades da actividade e configuración do local social.

Así mesmo, agregou o popular, “tamén conta co mobiliario roto e inservible desde hai meses; o baño reservado para persoas con mobilidade reducida se usa como almacén de material; carece de saída de emerxencia no salón de actos, polo que non se pode garantir unha eventual evacuación en caso de emerxencia; e as fochancas da entrada ou mesmo o portalón de acceso ao recinto, ademais da insuficiente iluminación exterior, impiden a realización de actividades ao aire libre; e a falta de roza e podas nunha finca municipal contigua, que ten unha maleza que pode provocar algún problema en caso de lume”.

“É especialmente preocupante -indicou De la Fuente- o estado do parque infantil exterior, que non esta totalmente valado e os coches aparcan sen ningún tipo de separación; nalgún tramo o fan entre os elementos de xogo, orixinando un potencial perigo para as nenas e nenos”.

Para o popular, “resulta incomprensible que na recente renovación de elementos do parque infantil non se previra a imprescindible acotación do mesmo, porque nesta situación non cumpre normativa de seguridade e resulta perigoso para os cativos”.

“O certo, -aclarou De la Fuente-, é que Laraño non é alleo á xestión calamitosa do goberno nacionalista no relativo aos centros socioculturais, como xa denunciamos estes días, os problemas dos contratos da rede de Centros Socioculturais foron evidenciados tamén por usuarios, traballadores e empresas contratistas, algo que fixo que o goberno local proclamara, varias veces, a próxima licitación duns novos contratos, pero máis de ano e medio despois, logo de sucesivos anuncios de inminentes licitacións, o único que fixeron os nacionalistas foi volver a prorrogar os mesmos”.

“Nestas instalacións, os servizos non se están prestando adecuadamente, o sabe todo o mundo: os nacionalistas obrigaron ás empresas a seguir xestionando un contrato que non poden defender economicamente e a consecuencia é falta de persoal, de material e a suspensións de actividades”, subliñou.

O edil popular remarcou que “o goberno nacionalista mentiu á oposición e, o que é máis grave, enganaron a traballadores, usuarios e empresas, non se entende que non liciten uns contratos cuxos pregos, recoñeceu o propio concelleiro, levan máis dun ano redactados”.

Finalmente, De la Fuente instou ao goberno local “a licitalos, canto antes, para rematar con esta precaria situación e os centros socioculturais poidan funcionar como é debido e os usuarios reciban os servizos que pagan”.