A parcela do antigo colexio Peleteiro, situada no Ensanche de Santiago, está a piques de experimentar unha importante transformación urbanística. A proposta de modificación do planeamento para este espazo pon o foco na vivenda, cunha reserva mínima do 45% para vivenda protexida, ademais de manter espazos comerciais en planta baixa e unha zona de equipamento comunitario de 900 metros cadrados.
Líder Redacción
20 de febrero de 2025 a las 17:39
A iniciativa, que conta coa conformidade da Sociedade de Xestión de Activos Procedentes da Reestruturación Bancaria (SAREB), propón unha redución da edificabilidade para uso lucrativo, pasando dos 23.500 metros cadrados previstos no planeamento vixente a 19.000 metros cadrados. Tamén se contempla unha mellora na integración do espazo no Ensanche, ampliando a apertura á rúa República de Arxentina e mantendo o acceso desde San Pedro de Mezonzo.
A ordenación prevista busca equilibrar a necesidade de vivenda accesible no centro da cidade cun modelo urbanístico que respecta a estrutura e dinámica do Ensanche compostelán. Ademais, resérvanse 1.395 metros cadrados para espazo público e un mínimo de 400 prazas de aparcamento.
O proxecto será analizado na comisión informativa de Urbanismo e someterase a votación no Pleno municipal do 27 de febreiro. De ser aprobado, marcará o inicio dun proceso que permitirá darlle un novo uso a uns terreos que levan anos sen actividade, contribuíndo á revitalización urbana e á oferta de vivenda protexida no centro de Santiago.
Recibe las noticias en tu correo.
