O goberno local de Boiro pisa o acelerador en vivenda, cultura e emprego

• José Ramón Romero destaca o premio estatal da FEMP polo proxecto educativo Enclave, a forte aposta pola vivenda social e a maior reforma cultural da historia recente do municipio, cun investimento de preto de 4 millóns de euros.

O alcalde de Boiro, José Ramón Romero, fixo balance da actualidade municipal nunha entrevista radiofónica na que puxo o foco na educación, a acción social, o emprego público e a cultura como piares fundamentais da acción de goberno. O rexedor amosouse “orgulloso” do recoñecemento recibido por parte da Federación Española de Municipios e Provincias (FEMP) polo proxecto educativo Enclave, ao tempo que avanzou o estado de importantes actuacións en materia de vivenda social, infraestruturas culturais e investimentos en todo o termo municipal, segundo se recolle na entrevista emitida en Radio Líder Santiago.

Romero salientou que o premio da FEMP, en colaboración co Ministerio de Educación, recoñece un programa “pioneiro a nivel estatal” dirixido á prevención do absentismo e á mellora da convivencia escolar. “É un recoñecemento a toda a comunidade educativa e ao traballo conxunto do equipo de goberno e dos técnicos municipais”, afirmou, asegurando que este galardón supón “un estímulo enorme para seguir traballando nesta liña”.

Vivenda social e acción comunitaria no centro das políticas municipais

Outro dos eixos centrais da entrevista foi a política de vivenda. O alcalde explicou a recuperación e rehabilitación das antigas vivendas dos mestres do CIP Praia Xardín, cunha actuación destacada nun inmoble unifamiliar que se destinará a vivenda de emerxencia social. “Será unha vivenda para situacións puntuais, como un incendio ou unha incidencia grave, para que ningunha familia quede sen teito”, explicou Romero. A actuación contou cun investimento municipal de preto de 75.000 euros, complementado con fondos da Deputación para o equipamento.

Ademais, avanzou que o Concello traballa xa en tres bloques de vivendas con marcado carácter social. Un deles acollerá un centro de día con 47 prazas en colaboración con Agadea, cuxas obras estarán rematadas, segundo as previsións, na primavera de 2026. “Estamos a dar uso a inmobles que estaban abandonados, mellorando o entorno urbano e devolvéndoos á cidadanía cun fin social”, subliñou.

Emprego público, investimentos e unha Casa da Cultura para o século XXI

No ámbito do emprego público, Romero anunciou a publicación da Oferta de Emprego Público de 2025, con nove prazas “estratéxicas” para reforzar o funcionamento municipal. “O persoal é clave para que un concello funcione, e esta OPE é un paso moi importante”, indicou, adiantando que en 2026 se convocarán tamén as correspondentes ás OPE de 2023 e 2024.

Un dos proxectos estrela do mandato é a reforma integral da Casa da Cultura, “a maior obra que se está a executar neste momento en Boiro”. Cun investimento de preto de 3,8 millóns de euros, financiados con fondos propios e europeos, o novo edificio contará cun auditorio con capacidade para 535 persoas. “Era unha instalación obsoleta; agora imos ter un espazo preparado para os vindeiros 40 anos”, afirmou o alcalde, convencido de que permitirá atraer programación cultural de maior nivel.

A esta actuación súmase un plan ambicioso de mellora dos centros sociais das parroquias, con intervencións en Cabo de Cruz, Cures, Escarabote, Ponte Beluso e na antiga Casa do Mar. “Queremos que a cultura e a vida social cheguen a todos os núcleos do municipio”, explicou.

Nadal, comercio local e colaboración público-privada

Romero tamén puxo en valor a programación de Nadal, deseñada en colaboración coa Asociación Boirense de Empresarios. “A coordinación entre o público e o privado é fundamental; Boiro está de moda porque hai unha poboación viva e un comercio forte”, asegurou, lembrando que o municipio foi un dos que mellor funcionou na campaña provincial Merca na vila.

Finalmente, o alcalde avanzou que o Concello ten en marcha obras por valor de preto de sete millóns de euros, repartidas por todo o municipio, e confirmou que os novos orzamentos municipais se aprobarán no primeiro trimestre do ano. “Queremos que os veciños vexan, con feitos, que estamos a traballar ao seu servizo”, concluíu.