O equipo biberón do Milladoiro SD acada o campionato de liga

O equipo máis cativo do Milladoiro SD, patrocinado pola librería Nenos Nais, vén de acadar o campionato de liga de fútbol sala da categoría Primeira Futgal FS

O equipo biberón do Milladoiro SD conseguiu catro vitorias e dous empates, con 14 goles a favor e 5 en contra

Ames, 20 de marzo de 2025.- O equipo máis cativo do Milladoiro SD, patrocinado pola librería Nenos Nais, vén de acadar o campionato de liga de fútbol sala da categoría Primeira Futgal FS, impoñéndose por un só un punto de diferencia á Escola Deportiva Xuventude Oroso.

O Concello de Ames, a través da Concellaría de Deportes, dá conta dun novo éxito dos deportistas amesáns. Neste caso do campionato de liga acadado recentemente polo equipo biberón do Milladoiro SD.

O equipo dirixido por Fran Macho, que conta coa axuda de Álvaro Iglesias e David Cabrejo, empatou 2-2, o último partido da competición contra o segundo clasificado, a Escola Deportiva Xuventude Oroso, mantendo a distancia dun punto na clasificación, e conseguindo deste xeito o título de liga para os rapaces amesáns.

O equipo biberón do Milladoiro SD conseguiu catro vitorias e dous empates, con 14 goles a favor e 5 en contra. Dito equipo está composto por 12 rapaces, que dispoñen de ficha, e outros dous que aínda non teñen a idade necesaria para xogar, pero que xa adestran cos compañeiros da categoría biberón.

O adestrador, Fran Macho, explica que “o fundamental é que os rapaces nestas idades de 3 a 6 anos se divirtan, que vaian aprendendo pouco a pouco, e que aprendan a tomar decisións eles mesmos no campo”. Ademais, dende o club amesán destacan a calidade destes rapaces, que incluso xa xogaron partidos en equipos da categoría superior en fútbol campo.

Agora, van a disputar a Copa da Primeira Futgal FS. Nesta competición o Milladoiro SD vai a xogar fronte ao Alto do Vento FS, Atlético Fátima, Bertamiráns CF, SR Calo, Sociedade Deportiva Urdilde e Villestro SD.