O eclipse de agosto e o Xacobeo 2027, claves da proxección internacional de Galicia

• O director de Turismo de Galicia destaca o crecemento sostido do sector, aposta pola internacionalización e chama a reforzar Santiago como gran escaparate turístico.

Nunha entrevista en Radio Líder Santiago, o director de Turismo de Galicia, Xosé Manuel Merelles, debullou as principais liñas estratéxicas do sector turístico galego nun contexto que definiu como “o mellor momento histórico” en termos de visitantes, ingresos e proxección internacional. A conversa percorreu desde iniciativas consolidadas como a Primavera de Portas Abertas nas rutas do viño ata grandes eventos futuros como o eclipse do 12 de agosto ou o Xacobeo 2027.

Merelles puxo en valor o enoturismo como un dos piares da oferta galega: “É un produto xa clásico onde as adegas das cinco denominacións de orixe abren as súas portas para amosar viño, gastronomía, paisaxe e cultura”, sinalou, recomendando aos visitantes consultar a web oficial para acceder a propostas organizadas que inclúen desprazamentos e experiencias completas nas distintas rutas.

Un dos puntos máis destacados da entrevista foi a preparación do eclipse solar do 12 de agosto, que situará a Galicia no mapa internacional. Segundo explicou, “vai ser un dos acontecementos máis importantes non só no eido turístico, senón tamén científico e de promoción internacional”. Subliñou ademais que boa parte do territorio galego contará con condicións privilexiadas para a súa observación.

O responsable turístico incidiu no traballo coordinado entre administracións para garantir a seguridade e a experiencia dos visitantes: “Queremos que sexa unha oportunidade para mostrarnos ao mundo como un destino excepcional, non só para fenómenos astronómicos, senón pola nosa natureza, cultura e gastronomía”.

A estratexia de apertura ao exterior foi outro dos eixos centrais. Merelles destacou o crecemento de mercados como Reino Unido e China: “Gran Bretaña é xa o cuarto mercado emisor e o que máis medra, cun 14% máis de visitantes”. Tamén puxo o foco no público chinés, que cualificou de emerxente pero en clara expansión.

A promoción do Camiño de Santiago continúa a ser clave, con accións específicas en distintos países e o impacto de produtos culturais como a serie El Buen Camino en Italia, que está a atraer novos visitantes.

Sobre o Ano Santo, Merelles foi contundente: “Non hai Xacobeo sen persoas, sen empresas e sen peregrinos”. A Xunta, a través da Xunta de Galicia, habilitou diferentes vías de participación, entre elas o plan de patrocinios e o programa “O teu Xacobeo”, que ofrece axudas para proxectos en todo o territorio.

A resposta, segundo indicou, está a ser moi positiva: “Temos máis de 200 propostas presentadas e queremos que sexa un acontecemento que implique a toda Galicia”. Ademais, avanzou a ambición institucional: “O Xacobeo 2027 vai ser o grande acontecemento que nos catapulte como destino de primeiro nivel”.

A entrevista tamén abordou a situación de Santiago de Compostela, epicentro do turismo galego. A pesar das boas cifras globais, Merelles recoñeceu unha certa inquietude: “O último mes no que medrou en Santiago o número de visitantes e a ocupación foi en xuño de 2025, coincidindo con O Son do Camiño”, explicou, o que pon de manifesto a importancia dunha boa programación cultural como un dos estímulos para atraer visitantes, dinamizar a cidade e consolidar a capital como un destino atractivo ao longo de todo o ano.

O director sinalou a necesidade de desestacionalizar a demanda: “Entre novembro e marzo hai que incentivar a oferta complementaria, especialmente congresos e convencións”. Asegurou, non obstante, o compromiso institucional con investimentos e colaboración co Concello para recuperar o pulso da cidade.

En relación ao peche temporal do aeroporto de Santiago, Merelles transmitiu tranquilidade: “A operativa está funcionando ben e non se produciron incidencias”. Defendeu ademais o traballo conxunto no sistema aeroportuario galego para mellorar rutas e conexións internacionais.

A mensaxe final foi clara e optimista: “Nunca tivemos tantos visitantes nin tantos ingresos no sector turístico”. Galicia, segundo Merelles, vive un momento clave para consolidarse como destino competitivo e diversificado, con eventos e estratexias que buscan reforzar a súa presenza global.