O Voleibol Santiago deixa fóra ata 80 rapaces cada ano debido as «promesas políticas non cumpridas» en infraestruturas

O seu presidente, Salvador Forján, asegura que cada tempada quedan entre 50 e 80 rapaces fóra do club por non dispoñer de pavillóns nin horarios suficientes

O Club Voleibol Santiago afronta un problema estrutural que limita o seu crecemento: a carencia de infraestruturas deportivas en Santiago de Compostela. Así o expuxo o seu presidente, Salvador Forján, nunha entrevista na que fixo balance da traxectoria dunha entidade con once anos de historia que conta actualmente con arredor de 300 persoas vinculadas ao club, das cales 180 dispoñen de ficha federada.

Forján explicou que o club naceu tras a súa experiencia previa no Club Deportivo Onsio e que o proxecto comezou “con tres rapaces”, medrando progresivamente ata consolidarse como unha referencia do voleibol de base na cidade. Na actualidade, o club compite en categorías autonómicas con equipos sénior, júnior e cadete, tanto masculinos como femininos, e chegou incluso a participar en competicións nacionais.

Con todo, o presidente recoñeceu que a falta de espazos e horarios condiciona seriamente a actividade diaria do club. “As horas non dan. Temos que rotar equipos nunha soa pista e iso impídenos aceptar máis xente”, explicou. Segundo indicou, cada tempada quedan fóra entre 50 e 80 nenos e mozos que queren iniciarse ou continuar practicando voleibol.

O club adestra en pavillóns municipais con horarios limitados e tamén en instalacións alugadas, como o pavillón do Seminario Menor, o que supón un esforzo económico adicional. “Temos que alugar espazos pola nosa conta porque non hai suficientes instalacións públicas”, sinalou.

Forján ampliou a crítica ao conxunto do deporte de base en Santiago, asegurando que non se construíron novos pavillóns deportivos nos últimos once ou doce anos. “Non é só un problema do voleibol. Pásalles ao baloncesto, á natación e a moitos outros deportes”, afirmou, ao tempo que lamentou a falta de implicación das administracións.

Especialmente duro foi coas promesas políticas non cumpridas. “Non prometas pavillóns se non os vas facer. As promesas son de aire”, asegurou, reclamando máis realismo e planificación a longo prazo.

No ámbito deportivo, destacou o aumento da participación masculina no voleibol, tradicionalmente máis feminizado. “Hai anos era un 90% mulleres e un 10% homes. Agora estamos máis preto dun 70-30 e segue medrando o número de rapaces”, indicou.

En canto ás aspiracións competitivas, Forján deixou claro que o club non busca a elite profesional. “A nosa prioridade é a base. Queremos crecer, pero dun xeito sostible”, explicou, lembrando que o club se financia principalmente coas cotas dos socios e pequenos patrocinios. “Aquí non hai soldos. Os rapaces pagan por xogar”, subliñou.

O presidente concluíu advertindo das consecuencias sociais desta situación: “Hai xente con ganas de facer deporte e queda fóra. Iso é triste e debería facernos reflexionar”.