O alcalde de Brión anuncia as prioridades desta lexislatura: «Un novo pavillón e loitar por un auditorio»

Nunha recente entrevista en Radio Líder Santiago, Pablo Lago, alcalde de Brión, fixo un repaso pola súa xestión dende que asumiu o cargo tras a dimisión do anterior alcalde. Lago, quen vén do sector autónomo, recoñeceu que a súa entrada na política foi un proceso inesperado. «Ofrecéronme formar parte do equipo de goberno, rexeiteino varias veces, pero ao final aceptei para intentar aportar algo dende dentro e mellorar Brión», comentou.

Lago amosouse comprometido co crecemento equilibrado do municipio, que experimentou un notable aumento de poboación, especialmente de mozas familias que buscan tranquilidade. «Temos 8.000 habitantes e seguimos medrando, pero a nosa prioridade é manter un desenvolvemento ordenado, sen xerar unha expansión desmesurada que comprometa os servizos básicos e a calidade de vida que ofrecemos», sinalou.

Entre os proxectos clave do seu mandato, destacou a construción dun novo pavillón deportivo e a loita por dotar a Brión dun auditorio, unha infraestrutura que, segundo Lago, é esencial para seguir fomentando a actividade cultural no municipio. Ademais, subliñou a importancia de mellorar as infraestruturas, como a renovación do alumeado público e o asfaltado das principais vías do concello.

Un dos retos máis complexos para o alcalde foi lidiar coa burocracia administrativa, un factor que, segundo el, atrasa moitos proxectos. «No mundo dos autónomos un organiza todo para resolver os problemas de inmediato, pero na administración todo leva máis tempo, sempre chegamos tarde», confesou.

No que respecta á educación, Lago expresou a súa preocupación pola falta de persoal docente nos colexios do municipio, unha situación que afecta non só a Brión, senón a toda a comarca. «Sempre apoiaremos calquera protesta por unha educación mellor, porque os nenos son o futuro», afirmou.

Lago tamén destacou a importancia das relacións con outras administracións, tanto coa Xunta de Galicia como coa Deputación, aínda que apuntou que sempre é posible recibir máis apoio. «Non me podo queixar, pero sempre hai marxe de mellora», engadiu.

Finalmente, convidou á cidadanía a desfrutar da Santa Minia, unha festa tradicional de Brión que se celebrará do 26 ao 29 de setembro e que, en palabras do alcalde, é unha oportunidade perfecta para desconectar e gozar da cultura local.

Con unha visión clara do que quere para Brión, Pablo Lago concluíu cunha promesa de continuar traballando por un concello que siga medrando de maneira orgánica, sen perder a súa esencia rural.

A entrevista completa no seguinte enlace.