A actividade supón un paso máis na enorme mobilización do pobo galego contra Altri, que continuará cunha concentración o 8 de maio fronte ao Congreso dos Deputados e unha gran manifestación o 1 de xuño en Pontevedra
Líder Redacción
5 de mayo de 2025 a las 00:28
22/03/2025. Padrónl, A Coruña
04052025 El domingo 4 de mayo, la Plataforma en Defensa de la Ría de Arousa (PDRA), la Plataforma Ulloa Viva, la Plataforma Mina Touro-O Pino Non, Adega, Greenpeace Galicia, Ecologistas en Acción, la Sociedad Galega de Historia Natural, Baixo Ulla Vivo, el Ayuntamiento de Padrón, el Ayuntamiento de Pontecesures y Kayac extremo Galiza convocan una concentración en defensa del RÍO ULLA.
©Greenpeace/Pedro Armestre
©Greenpeace Handout/Pedro Armestre- No sales – No Archives – Editorial Use Only – Free use only for 14 days after release. Photo provided by GREENPEACE, distributed handout photo to be used only to illustrate news reporting or commentary on the facts or events depicted in this image.
O descenso do río discorreu polo Sistema fluvial Ulla-Deza, unha Zona de Especial Conservación da Rede Natura 2000 cuxos valores naturais perigan polos proxectos industriais da Xunta de Galicia
O pasado 23 de abril coñecíase que o Goberno central deixaba fóra a Altri dos fondos PERTE para a descarbonización, un paso moi importante para evitar un malgasto de cartos públicos inasumíbel e inxusto
Greenpeace pediu ao Goberno central que non achegue ningún tipo de financiamento para unha iniciativa tan lesiva ambiental e socialmente e esixiu a Altri e á Xunta que descarten o proxecto
Santiago de Compostela, 4 de maio de 2025.- Decenas de embarcacións de ráfting, caiacs e piraguas realizaron hoxe un descenso reivindicativo polo último tramo do río Ulla, desde a Ponte de Sinde até o Campo dá Insua, en Padrón, xa moi preto da súa desembocadura na ría de Arousa. Ao final do percorrido, milleiros de persoas agardaron polas embarcacións e leron un manifesto esixindo que se descarten definitivamente o proxecto de macrocelulosa de Altri na Ulloa e a Mina de Touro. Os dous proxectos industriais desenvolveríanse, moi preto o un do outro, na conca do río Ulla, afectando aos ecosistemas e a calidade das augas e poñendo en perigo a ría de Arousa.
O descenso reivindicativo discorreu na súa totalidade polo sistema fluvial Ulla-Deza, unha Zona de Especial Conservación da Rede Natura 2000 cuxos valores naturais perigan polos dous proxectos industriais que a Xunta de Galicia declarou de interese estratéxico, diante dunha oposición social histórica. O espazo natural, de máis de 1.600 hectáreas, inclúe unha valiosa rede hidrográfica que serve de fronteira entre as provincias da Coruña e Pontevedra, acubillando decenas de hábitats de interese comunitario, algúns deles prioritarios, e numerosas especies protexidas, como a lamprea, o salmón atlántico, a toupa de ría, a londra ou a endémica saramaganta. Asemade, calcúlase que máis de 200.000 habitantes de numerosos concellos dependen da calidade hídrica do río Ulla para a subministración das redes municipais de auga.
Esta acción súmase ás moitas que levan realizando en Galicia no último ano, especialmente contra a macrocelulosa de Altri, e puxo novamente de manifesto que a cidadanía galega non está disposta a aceptar ningún tipo de proxecto industrial que poña en perigo os seus espazos naturais e modos de vida. Desde que en maio de 2024 unhas 20.000 persoas de toda Galicia se manifestaran contra a macrocelulosa na zona cero, Palas de Rei, víronse as mobilizacións máis grandes que se lembran en Galicia desde a crise do Prestige. Centos de barcos entrando co Arctic Sunrise de Greenpeace na ría de Arousa en xuño pasado, decenas de milleiros rodeando a sede da Xunta de Galicia en Compostela, preto de 100.000 persoas enchendo até tres veces no mesmo día a Praza do Obradoiro, e mesmo unha mobilización por terra e por mar, tamén masiva, hai poucas semanas na Pobra do Caramiñal. Desde que se someteu a exposición pública o proxecto de Altri fai máis dun ano, o movemento na súa contra non fixo máis que medrar.
A instalación da enorme fábrica de celulosa que Altri pretende emprender na comarca da Ulloa atravesa actualmente uns dos seus momentos críticos, á espera dunha posíbel Autorización Ambiental Integrada (AAI) por parte da Xunta de Galicia, diante da cal moitas organizacións, entre elas Greenpeace, xa anunciaron recursos xudiciais. O pasado 23 de abril, o Ministerio de Industria revelou que a empresa quedaba fóra das axudas do PERTE de descarbonización por non poder cumprir os prazos, por empregar demasiados combustíbeis fósiles e por non evitar o suficiente a emisión de gases de efecto invernadoiro. Con todo, responsábeis da mesma declararon que andan a procurar outras fontes de financiamento en forma de axudas públicas directas, algo que tratan de evitar as organizacións que se enfrontan ao proxecto. Con este obxectivo tamén hai convocada, o vindeiro 8 de maio ás 19.00, unha concentración da colectividade galega en Madrid, fronte ao Congreso dos Deputados, para esixirlle ao Goberno que non destine ningún tipo de axuda pública ao que consideran o proxecto industrial máis lesivo que se presentou en Galicia nas últimas décadas.
Ademais, as organizacións animan á cidadanía galega a participar masivamente, o vindeiro 1 de xuño ás 12.00, na xa tradicional marcha contra as celulosas en Pontevedra, que discorrerá baixo o lema “Nin Ence na ría, nin Altri na Ulloa”.
A actividade de hoxe en Padrón estivo organizada pola Plataforma Ulloa Viva, a Plataforma en Defensa da Ría de Arousa (PDRA), a Plataforma Mina Touro-O Pino Non, Adega, Greenpeace, Ecoloxistas en Acción, Sociedade Galega de Historia Natural, Baixo Ulla Vivo e Caiac Extremo Galiza, coa colaboración dos concellos de Padrón e Pontecesures.
Recibe las noticias en tu correo.
