Xosé Manuel Merelles: «Non hai destino máis diverso que Galicia»

• Xose Manuel Merelles destaca en Radio Líder o papel clave da desestacionalización e a diversificación no crecemento turístico da nosa comunidade.

O director de Turismo de Galicia, Xosé Manuel Merelles, compartiu en entrevista con Álvaro Veiga en Radio Líder Santiago as súas impresións sobre a participación galega en FITUR 2025. Segundo Merelles, «Galicia segue estando de moda», tal como o demostran os datos e a alta afluencia de visitantes ao stand galego durante os cinco días da feira, celebrada en Madrid do 22 ao 26 de xaneiro.

O responsable turístico salientou que o stand de Galicia destacou non só pola súa estética e organización, senón pola ampla representación territorial. “Preto de 50 presentacións realizadas por comarcas de toda Galicia reflectiron a diversidade e riqueza da nosa oferta turística”, explicou Merelles, quen tamén resaltou as mil reunións de traballo entre empresarios organizadas polo Clúster Turismo de Galicia.

Desestacionalización e diversificación, as claves do futuro

Un dos obxectivos principais do turismo galego, segundo Merelles, é lograr que a actividade turística se manteña activa durante todo o ano. «Galicia ten capacidade para acoller moitos máis visitantes, non só no verán ou na Semana Santa, senón tamén en meses tradicionalmente menos turísticos. Este é o camiño que queremos seguir», afirmou.

O director tamén fixo referencia ás campañas de promoción para zonas menos coñecidas, como Valdeorras, destacando o seu potencial en enoturismo e turismo de natureza. «Cada vez son máis os territorios galegos que se benefician do turismo, e isto reforza a idea de que Galicia é un destino para todo o ano e para todos os gustos», engadiu.

FITUR 2025 supuxo unha plataforma ideal para presentar proxectos como a España Verde, unha iniciativa que agrupa as comunidades do norte peninsular (Galicia, Asturias, Cantabria e País Vasco). Esta marca recibiu o ano pasado 20 millóns de visitantes, o que representa un 15 % máis que no ano anterior. Galicia liderou esta iniciativa en 2024 e cedeu o relevo a Cantabria durante a feira.

Ademais, Merelles destacou o impacto positivo da presenza de figuras públicas no stand galego, como o presidente do Goberno, Pedro Sánchez, quen valorou a importancia da natureza e o clima galegos como reclamos turísticos. O director tamén subliñou o éxito da sección de artesanía, especialmente coa representación da artista que creou flores de papel que captaron a atención dos visitantes.

Expectativas para 2025

«O 2024 rematou dun xeito excepcional, e o 2025 preséntase con grandes expectativas», declarou Merelles, quen avanzou que a Xunta de Galicia está a traballar en novas campañas de promoción turística e en liñas de axuda para o sector.

Entre os retos para este ano, sinalou a importancia de continuar ampliando as conexións de transporte, especialmente en tren, que superou ao avión como medio de transporte preferido para viaxes entre Galicia e Madrid.

Con eventos como o Entroido e a Semana Santa no horizonte, Galicia espera consolidar a súa posición como destino turístico de referencia, apostando por un turismo sostible, diversificado e accesible para visitantes de todo o mundo.

«Galicia é un destino que permite presumir todo o ano», concluíu Merelles, quen aproveitou para felicitar o traballo de todo o equipo implicado na promoción da comunidade durante FITUR.

A entrevista completa, no seguinte enlace.