• A directora asistiu á proxección do seu documental ‘El Proxeneta’ e participou no debate posterior
• A concelleira de Igualdade, Mariló Saco, recorda que este acto dálle continuidade o traballo que se comezou hai meses nos institutos co visionado de ‘Chicas nuevas 24 horas’
Líder Redacción
14 de marzo de 2025 a las 22:49
Padrón. 14-3-2025.- Mabel Lozano, cineasta e activista na loita contra a explotación sexual das mulleres, avogou este venres, 14 de marzo, en Padrón pola abolición da prostitución durante o debate que seguiu á proxección de ‘El proxeneta. Paso corto, mala leche’, documental no que se achega ao sórdido mundo da prostitución a través do duro testemuño dun tratante de mulleres arrepentido.
Na presentación do acto, enmarcado nas actividades organizadas polo Concello de Padrón, para conmemorar o Día da Muller, a concelleira de Igualdade resaltou que “Mabel visibiliza na súa extensa filmografía a denuncia e a loita contra a violencia sexual que sufrimos as mulleres mediante a trata, a prostitución e a pornografía”.
Mariló Saco incidiu tamén en que a proxección de ‘El proxeneta’ “supón a continuidade dun traballo de sensibilización e reflexión que o Concello de Padrón comezou hai meses nos institutos co visionado doutro documental de Mabel Lozano, ‘Chicas nuevas 24 horas’, no que aborda o negocio da compravenda de mulleres e nenas”.
O público que ateigou o auditorio municipal de Padrón para ver ‘El proxeneta’, cinta que desenvolve a trama dun libro escrito tamén por Mabel Lozano, quedou impactado co retrato da evolución da prostitución en España dende os anos 80 ata a actualidade. Miguel ‘El Músico’, que rexentou con seus exsocios unha ducia dos macroburdeis máis importantes de España, relata no documental o proceso de transición entre a prostitución en mans de chulos e macarras ata a trata de mulleres e saca á superficie un universo dominado pola trata de seres humanos, os asasinatos, os secuestros, as extorsións, o lavado de diñeiro e outros delitos.
Mabel Lozano, gañadora de dous Premios Goya por curtametraxes documentais que denuncian a explotación sexual das mulleres, defendeu durante o debate a abolición da prostitución e incidiu na esclavitude á que son sometidas moitas mulleres, captadas ou directamente secuestradas nos seus países de orixe. Ademais, denunciou a existencia dunha trama delitiva na que os proxenetas contan coa complicidade de avogados, médicos ou policías corruptos e resaltou que hoxe en día son moitas as persoas novas que dan o salto á prostitución e a condutas sexuais abusivas dende o material pornográfico accesible sen censura algunha en Internet.
Recibe las noticias en tu correo.
