Éxito da Exposición da Camelia e do Bonsái de Padrón con 72 expositores

• A novena edición celebrou o irmandamento entre os concellos de Padrón e Vedra, fortalecendo os lazos culturais e naturais entre as dúas localidades
• O certame contou cun amplo programa de actividades, desde obradoiros e demostracións ata visitas guiadas
• O evento recoñeceu as mellores camelias de Galicia nas categorías de orixe galega, camelia xapónica, reticulata, híbrida, e outras especies, poñendo en valor o traballo de cultivadores e expertos de todo o país

Padrón. 31-3-2025.- O Convento do Carme de Padrón converteuse esta fin de semana nun punto de encontro para amantes da natureza e da arte floral coa celebración da IX Exposición da Camelia e do Bonsái. O evento, organizado polo Concello de Padrón coa dirección de José Freire, reuniu un récord de 72 expositores, consolidándose como unha das citas máis destacadas do calendario floral galego.

A primeira xornada, celebrada o sábado 29 de marzo, comezou coa colocación das flores e cun emotivo acto de inauguración que destacou polo irmandamento entre a Exposición da Camelia de Vedra e a de Padrón. O alcalde de Padrón, Anxo Arca, e o de Vedra, Carlos Martínez, asinaron no libro de honra do Convento, deixando constancia dos lazos que unen a ambos municipios. O acto contou ademais coa presenza de numerosos veciños de Vedra que se desprazaron ata Padrón para participar na xornada.

Un dos momentos máis agardados foi a entrega de premios aos mellores expositores nas seis categorías establecidas, que recoñeceron a calidade e a beleza das camelias presentadas. Os galardoados foron:

Mellor flor de orixe galego: Eusebio López (Fene)

Camelia xapónica: Maru Míguez (Pontevedra)

Camelia reticulata: Isabel Pazos (Tomiño)

Camelia híbrida: Geli Piñeiro (Tomiño)

Outras especies de camelia: Abelardo Barcala (Vilagarcía)

Premio Camelia do Sar: Serafina Rodríguez (Vilagarcía)

Ademais, a xornada contou cun obradoiro de elaboración de sombreiros sancosmeiros e unha demostración de arte floral con camelias a cargo de Floraría Chorima.

O domingo 30 de marzo, a televisión pública galega (TVG) achegouse ata o Convento para gravar unha reportaxe sobre o evento, poñendo en valor a riqueza natural e artística da exposición.

Durante o día, os asistentes puideron participar en diversas actividades como un obradoiro de cerámica, unha visita guiada pola exposición con José Freire e un taller de poda e coidado de froiteiras impartido por Alfonso Touceda no exterior do convento aproveitando o bo tempo deste domingo.

A exposición deste ano volveu contar cunha impresionante colección de bonsáis grazas ao traballo de Luis Baliño e José Freire, ademais dunha mostra de xoiería inspirada en camelias e orquídeas. Tamén se exhibiron esculturas das artistas Ángeles Garrido e Ana González, así como creacións do alumnado de Ategal Padrón.

O certame pechou as súa portas ás 19:00 horas do domingo, deixando unha fin de semana inesquecible para Padrón e para todos os amantes da camelia e do bonsái. O evento, que cada ano gaña máis relevancia, reafírmase como unha cita imprescindible no calendario cultural e botánico de Galicia.