Esther Martínez, FANPA Compostela: “Antes que evitar o móbil, é mellor preparar, educar e acompañar”

• A presidenta de FANPA Compostela, Esther Martínez, chama a formar e apoiar ás familias no uso responsable das tecnoloxías e presenta a xornada “Móbiles con sentido”, que se celebra este sábado na Facultade de Filoloxía da USC

A Federación de ANPAS Compostela (FANPA Compostela), en colaboración con ANPAS Galegas, organiza este sábado 25 de outubro a xornada aberta “Móbiles con sentido: acompañar e educar a adolescencia no seu uso”, que se celebrará na Facultade de Filoloxía da Universidade de Santiago de Compostela, de 10:00 a 13:30 horas.

O encontro, con acceso libre mediante inscrición previa, reunirá especialistas en Psicoloxía, Educación Social e saúde emocional para abordar un dos retos máis complexos da crianza actual: o uso das pantallas e dos teléfonos móbiles entre adolescentes.

En declaracións a Radio Líder, a presidenta de FANPA Compostela, Esther Martínez, explicou que a iniciativa xorde “porque nas familias detectamos unha certa alarma arredor do uso dos móbiles, sobre todo polo acceso a contidos inapropiados, á desinformación ou a situacións de acoso”.

Porén, Martínez insiste en que o obxectivo da xornada é ofrecer un enfoque construtivo: “Antes que evitar o móbil, é mellor preparar, educar e acompañar. O acceso vai ocorrer antes ou despois, sexa cun dispositivo propio ou alleo, por iso é importante aprender a acompañar desde o diálogo e a confianza”.

A presidenta da federación defende que o debate debe ir máis alá da idade na que se entrega o primeiro teléfono: “Cada familia é distinta, cada neno e cada nena teñen un desenvolvemento e unha madurez diferentes. Non hai respostas únicas para cuestións complexas”.

A xornada contará coa conferencia inaugural “Ser en Internet: adolescencias e vínculos na era dixital”, a cargo do psicólogo clínico Ricardo Fandiño Pascual, e cunha mesa redonda moderada pola xornalista Laura Veiga, baixo o título “Móbiles e TICs nas familias, SOS! Unha ollada profesional”. Participarán Sonia González Rodríguez, presidenta do Colexio de Educadoras e Educadores Sociais de Galicia; Belén Montesa Lou, vicepresidenta da sección de Psicoloxía Educativa do Colexio Oficial de Psicoloxía de Galicia; e Concepción Estévez Villar, presidenta de ASEIA.

Martínez salienta tamén a necesidade de promover unha alfabetización dixital crítica tanto nos centros educativos como nos fogares: “Non podemos pretender que a rapazada volva aos xornais, pero si podemos ensinarlles a facer unha lectura crítica do que consumen nas redes e a contrastar a información”.

A participación na xornada é libre e gratuíta, mais require inscrición previa a través do formulario dispoñible neste enlace. As familias que o precisen poderán acceder a un servizo de ludoteca gratuito para crianzas de 3 a 12 anos.

Con esta iniciativa, FANPA Compostela —que agrupa a máis de 80 ANPAS de Santiago e da súa contorna— quere ofrecer un espazo de encontro e reflexión arredor dun dos debates máis actuais na educación: como acompañar á adolescencia no uso das tecnoloxías dixitais.