Demanda veciñal para humanizar varías rúas do corazón de Santiago

A entidade veciñal puxo o foco nunha zona incluída na Zona de Baixas Emisións, onde considera prioritario realizar un estudo detallado do tráfico ao longo do ano, tanto en tempada baixa como en períodos lectivos e turísticos, co obxectivo de cuantificar a presión circulatoria.

Entre as súas demandas, a asociación insistiu en que a modificación do Plan Especial da Cidade Histórica recoñeza os usos loxísticos existentes e garanta prazas de aparcadoiro axeitadas. Neste sentido, propoñen o traslado da oficina comarcal de Correos a un polígono industrial e a creación dun almacén de última milla nas instalacións de UFD en Galeras.

Un dos puntos máis contundentes da intervención foi a situación do aparcadoiro de San Clemente. Segundo a asociación, unha das súas plantas permanece baleira a maior parte do ano, mentres veciños e traballadores da zona teñen dificultades para estacionar.

Por iso, FONSECA reclama a reversión da concesión desta infraestrutura, construída en solo público, ao considerar que “non está a servir ao interese xeral” e que está a expulsar aos usuarios habituais.

Tamén denunciaron que, tras o incendio da comisaría da Policía Nacional o pasado febreiro, os vehículos policiais están a estacionar na praza, ofrecendo unha imaxe negativa e agravando os problemas de mobilidade.

A asociación alertou ademais do colapso que se produce durante o verán na rúa de San Clemente, dificultando o acceso a residentes, servizos de emerxencia e a un garaxe privado con máis de 60 prazas. Critican que o departamento municipal de tráfico non adoptase medidas para corrixir esta situación.

FONSECA ampliou as súas críticas a outros ámbitos da xestión urbana. Así, denunciou o incumprimento das ordenanzas sobre terrazas, a falta de control na recollida de lixo —especialmente grave nun espazo próximo ao Pazo de Fonseca— e o deterioro do mobiliario urbano.

A asociación tamén reclamou unha mellor atención ás persoas sen fogar, alertando da situación existente na zona de Correos e propoñendo medidas urbanísticas para evitala.

Tras a intervención veciñal no pleno, o grupo municipal socialista presentou unha moción para apoiar estas demandas e avanzar na mellora da mobilidade e da calidade urbana no centro histórico.