Carmen Calvo reivindica en Padrón a forza do feminismo para loitar contra os ataques á democracia

• A presidenta do Consello de Estado foi recibida polo alcalde, Anxo Arca, e asinou no Libro de Honra do Concello
• Presentou no auditorio o seu libro ‘Nosotras: el feminismo en democracia’

Padrón. 7-10-2025. Carmen Calvo, presidenta do Consello de Estado e vicepresidenta do Goberno, reivindicou esta tarde no auditorio de Padrón a forza do feminismo para facerlle fronte aos discursos actuais que poñen en perigo a democracia. Sinalou que non pode haber democracia se non hai igualdade e que, conquistados os espazos públicos, é hora de que as administracións aborden como prioritarios os asuntos que afectan as mulleres.

A exvicepresidenta do Goberno presentou no auditorio padronés o seu libro Nosotras: el feminismo en democracia, no que aborda os avances e os retos do feminismo español. No acto, organizado polo Centro de Información á Muller Terras de Iria, estivo acompañada polo alcalde de Padrón, Anxo Arca; o alcalde de Dodro, Xabier Castro; a concelleira de Igualdade de Rois, Mercedes Basante; e a concelleira de Igualdade de Padrón, Mariló Saco. Tamén participaron nos actos os concelleiros Chus Campos, Luis Mariño e Laura Horta.

“Para que haxa democracia plena ten que haber igualdade. Iso é básico. A partir de aí, falaremos de feminismo cando poidamos plantexar unha axenda propia das mulleres”, sinalou Carmen Calvo, que definiu o feminismo como “unha revolución que cambia mentalidades e actitudes e que se constrúe non en contra dos homes, senón en contra dun sistema que prexudica as mulleres”.

A presidenta do Consello de Estado explicou que o seu libro trata sobre o “corpo e o poder” e resaltou que, mentres os homes gañaban no século XVIII a condición de cidadáns donos de seu, as mulleres quedaron excluídas. Hoxe en día, subliñou, “aínda se cuestiona o aborto e se comercia co seu corpo con prácticas como a prostitución e os ventres de aluguer”.

A presentación Nosotras: el feminismo en democracia estivo precedida por unha visita institucional ao Concello de Padrón, onde Carmen Calvo foi recibida polo alcalde e outros membros do goberno local. A presidenta do Consello de Estado asinou no Libro de Honra municipal e recibiu de mans de Anxo Arca unha figura de Sargadelos de Rosalía de Castro e o libro que recolle os Escritos feministas da autora galega máis universal.

Precisamente sobre Rosalía sinalou que forma parte, xunto a Concepción Arenal e Emilia Pardo Bazán, da tríada galega que marcou o principio da loita polos dereitos da muller en España.

Tal e como recordou Anxo Arca durante a presentación, a visita de Carmen Calvo enmárcase no amplo programa de actos cos que o Concello de Padrón busca deixar patente o seu compromiso coa igualdade de xénero e coa promoción de espazos de encontro e debate arredor das políticas feministas.