O alcalde do Concello de Brión, Pablo Lago, abordou os retos do municipio en Radio Líder Santiago, desde a xestión das pasadas tormentas ata os proxectos de vivenda e infraestruturas culturais.
Líder Redacción
5 de febrero de 2025 a las 22:34
O inicio do ano veu marcado por fortes borrascas que causaron estragos en varias zonas do concello. Lago destacou o traballo das administracións locais para minimizar os danos: «Intentamos facer as cousas o mellor posible, pero non sempre se pode chegar a todos os lugares ao mesmo tempo». Tamén anunciou a elaboración dun «plan de mellora das canalizacións nas zonas máis desprotexidas» para evitar futuras inundacións.
Brión aposta polo crecemento ordenado e a mellora dos servizos para a veciñanza. «Queremos aumentar poboación, pero de maneira planificada, garantindo que os novos residentes teñan acceso a servizos básicos», explicou Lago. O concello adquirirá terreos para desenvolver 50 vivendas protexidas e outras 50 de libre acceso. «A nosa prioridade é que a xente nova de Brión poida quedarse no concello con acceso a vivenda digna».
Entre os proxectos destacados para este ano, o alcalde confirmou a ampliación do pavillón deportivo, a mellora do campo de fútbol de Bastavales e a reforma das beirarrúas e aparcamentos na zona central do concello.
Ademais, Lago manifestou o seu compromiso cunha vella demanda cultural: a construción dun auditorio municipal. «Brión precisa un espazo digno para a cultura. É unha das miñas prioridades», afirmou.
O Entroido é unha das citas máis esperadas no concello, e este ano non será unha excepción. «O ano pasado disfraceime e este ano tamén o farei», asegurou Lago con humor. O evento contará con comparsas, carrozas e premios para animar a participación veciñal.
O alcalde recoñeceu que o orzamento municipal, de sete millóns de euros, resulta «moi escaso». Debido ao incremento dos custos da xestión de residuos e a subministración de auga, avanzou que haberá unha revisión das taxas municipais: «En Brión será necesario aumentar impostos para garantir servizos básicos, como a recollida do lixo e o abastecemento de auga».
Lago tamén reivindicou unha política municipal baseada no diálogo e a escoita activa: «O Concello está aberto a todos os cidadáns. Sempre atenderemos as súas peticións de maneira ordenada».
A entrevista completa, no seguinte enlace.
Recibe las noticias en tu correo.
