Santiago ten 24.000 persoas maiores de 65 anos, das que case 4.800 viven soas
A problemática da soidade non desexada e as ferramentas para atallala centraron hoxe a “Xornada sobre boas prácticas e iniciativas para maiores en Compostela”, organizada pola Concellaría de Dereitos e Servizos Sociais. Ducias de persoas déronse cita no centro sociocultural Maruxa e Coralia para participar no encontro, “unha proposta que naceu do Consello Municipal de Persoas Maiores”. A concelleira María Rozas sinalou que “o interese que espertou esta xornada demostra que as persoas maiores queren participar na vida pública e na toma das decisións que lles afectan, e é obriga das administracións públicas atender esa demanda”.
Líder Redacción
18 de noviembre de 2024 a las 12:17
A tenenta de alcaldesa lembrou que en Santiago temos 24.000 persoas maiores de 65 anos, das que case 4.800 viven soas. María Rozas incidiu en que “falamos de 24.000 persoas que requiren políticas públicas específicas e recursos concretos para cubrir as súas necesidades, pero sobre todo son 24.000 persoas que queremos que sigan sendo parte activa da comunidade, que teñen moito que achegar, moitos coñecementos que transmitir e moita memoria que conservar”. A concelleira de Dereitos e Servizos Sociais reiterou o seu compromiso co fomento da participación dos e das maiores, “porque é unha ferramenta fronte á soidade non desexada, que ten graves consecuencias na saúde física e mental dos maiores, e contra a que temos que actuar desde as administracións públicas”.
Na xornada tamén se fixo un repaso polos recursos municipais dispoñibles para as persoas maiores, como o Servizo de Axuda no Fogar, o servizo de teleasistencia ou o servizo municipal de emerxencias.
Conferencias e mesas de debate
A xormada “Boas prácticas e iniciativas para maiores en Compostela” abriuse cuha ponencia inaugural de Mercedes Gallego, xefa de servizo na coordinación de estudos do IMSERSO, que avaliou a situación das persoas maiores no conxunto do Estado e en Galicia e deu conta dos diferentes recursos que o Instituto de Maiores e Servizos Sociais pón ao seu dispor, en colaboración tamén con outras administracións.
Posteriormete celebrouse unha mesa redonda sobre “Boas prácticas públicas e comunitarias no loita contra a soidade non desexada”, moderada por Isabel González-Abraldes, doutora en xerontoloxía, profesora e investigadora da Universidade da Coruña. Na palestra participaron Enrique Cano, xefe do departamento de Promoción de Persoas Maiores do Concello de Barcelona; Mireia Gasol, xefa do departamento de Programas e Atención Social e Soporte aos Centros de Servizos Sociais do Concello de Barcelona; Ana Isabel Esteban, presidenta de Solidariedade Interxeracional; e Esperanza Linares, vicepresidenta do consello reitor da iniciativa de vivenda colaborativa “Trabensol” de Madrid.
A segunda mesa redonda, moderada por Daniel Longarela, coordinador de formación do Colexio Oficial de Educación Social de Galicia; versou sobre a intervención profesional fronte á soidade non desexada desde unha perspectiva multidisciplinar. No debate participaron representantes dos colexios oficais de Psicoloxía, traballo Social e Educación Social de Galicia.
