Habilitaranse desvíos alternativos durante o asfaltado por rúas adxacentes á N-550 (avenida de Rosalía de Castro) e haberá traslados provisionais de paradas de autobús
Líder Redacción
2 de julio de 2025 a las 11:32
As afectacións ao tráfico durarán previsiblemente ata o final das obras
A actuación conta cun orzamento de 4,4 millóns de euros a cargo do Plan de Recuperación, Transformación e Resiliencia
Ames, 1 de xullo de 2025.- O Ministerio de Transportes e Mobilidade Sostible continúa executando as obras de humanización da avenida de Rosalía de Catro, entre os quilómetros 67,075 e 68,600 da N-550, no Milladoiro. A partir deste mércores, 2 de xullo, haberá diferentes cortes de tráfico. Habilitaranse desvíos alternativos durante o asfaltado por rúas adxacentes á N-550 (avenida de Rosalía de Castro) e haberá traslados provisionais de paradas de autobús. As afectacións ao tráfico durarán previsiblemente ata o final das obras. As obras contan cun orzamento de 4,4 millóns de euros (IVE incluído) financiados cos fondos europeos Next Generation do Plan de Recuperación, Transformación e Resiliencia (PRTR).
O Concello de Ames, a través do Ministerio de Transportes e Mobilidade Sostible, informa de que sempre que a meteoroloxía o permita e para garantir a seguridade dos traballadores e usuarios, a partir das 8:30 horas do mércores, 2 de xullo, levaranse a cabo os diferentes cortes de tráfico que irán transcorrendo de xeito progresivo:
-De 8:00 a 21:30 horas os días 2 e 3 de xullo (mércores e xoves), cortarase a marxe esquerda entre a rúa Seidón (km 67,900) e a rúa Figueiras (km 67,700). O tráfico desviarase pola marxe dereita, sen restrición de paso, tanto en sentido Santiago como en sentido Padrón.
-De 8:00 a 17:00 horas do venres 4 de xullo, e de 8:00 a 21:30 horas os días 7 e 8 de xullo (luns e martes), cortarase o tráfico na marxe esquerda entre a rúa Figueiras (km 67,650) e a rúa do Rego (km 67,250). Habilitarase un itinerario alternativo, debidamente sinalizado, pola rúa do Rego. Ademais, dúas paradas de bus trasladaranse temporalmente fóra do tramo en obras.
-De 8:00 a 21:30 os días 9 e 10 de xullo (mércores e xoves), e de 8:00 a 17:00 o venres 11 de xullo, cortarase o tráfico na marxe esquerda entre a glorieta da SC-20 (km 67,070) e a a rúa Cruxa (km 67,650). Para asegurar a fluidez do tráfico, habilitarase un itinerario alternativo, debidamente sinalizado, pola avenida do Muíño Vello, Travesía do Porto e rúa da Madalena. Para os buses urbanos, habilitarase o desvío por rúa Agro do Medio e rúa Cruxa. Ademais, unha parada de bus será trasladada fóra do tramo afectado.
Doutra banda, seguen vixentes as afectacións en todo o tramo da Travesía do Milladoiro, onde se está reducindo de dous a un só carril por sentido de circulación. Continúan por tanto habilitados itinerarios alternativos debidamente sinalizados. Recoméndase, con carácter xeral, que os itinerarios entre a cidade de Santiago e Padrón se realicen evitando a Travesía do Milladoiro, utilizando a autovía AG-56 e a vía de alta capacidade VG-1.7.
Propóñense as seguintes alternativas:
-Para saír de Santiago de Compostela en dirección Padrón, proponse a incorporación á Autovía AG-56 na conexión coa SC-20, e saída no enlace de Pardiñas (km 3), dirección á vía de alta capacidade VG-1.7, cara á travesía dás Galanas.
-Para entrar en Santiago de Compostela desde Pontevedra ou Padrón, proponse a incorporación á vía de alta capacidade VG-1.7, situada no km 69,200 da N-550, dirección Santiago, incorporación á Autovía AG-56 dirección Santiago de Compostela, e saída na conexión coa estrada SC-20.
No caso dos traxectos locais, para acceder ás vivendas ou establecementos do núcleo urbano de Milladoiro, recoméndase utilizar rúas paralelas á Travesía do Milladoiro e evitar así o tramo en obras. Así mesmo, para acceder e saír do parque empresarial Novo Milladoiro recoméndase utilizar os viarios que conectan ao polígono coa VG- 1.7 no enlace de Biduído, e a súa posterior conexión coa AG-56.
As afectacións ao tráfico durarán, previsiblemente, ata o final das obras. Os desvíos foron acordados entre o Ministerio de Transportes e Mobilidade Sostible e o Concello de Ames. Para calquera consulta relativa ás obras, lémbrase aos cidadáns que teñen a disposición a oficina de obra situada na rúa Costa Grande, número 2, local 2, entre as 9:00 e as 13:00 horas, e entre as 15:00 e as 19:00 horas de luns a venres. O teléfono de contacto é 881 817 218.
Así mesmo, dispoñen do correo electrónico milladoiro@eptisa.com, no que poderán realizar reclamacións, incidencias ou suxestións asociadas coas obras de humanización da travesía do Milladoiro
Recibe las noticias en tu correo.
