A Xunta destaca o papel de Fala que Fala como exemplo de promoción da lingua nos centros educativos
Líder Redacción
25 de mayo de 2026 a las 23:26
A Xunta de Galicia presentará o vindeiro mes de xuño o documento que recolle a actualización do Plan xeral de normalización da lingua galega, un dos piares fundamentais do Pacto pola Lingua impulsado polo Executivo autonómico. Así o anunciou hoxe o conselleiro de Cultura, Lingua e Xuventude, José López Campos, en resposta a unha interpelación no Parlamento, durante a que incidiu en que, tomando como base esta nova proposta, “ábrese un novo escenario para acadar medidas fundamentais para a nosa lingua”.
Neste sentido, o representante do Goberno galego lembrou que “desde o principio tivemos a man tendida á participación neste proceso polo ben do galego, no que implicamos sempre os grupos parlamentarios que así o quixeron”. Ademais, destacou que a renovación do plan é o resultado do traballo de 11 comisións de expertos en diferentes materias que, durante os últimos meses, realizaron máis de 400 contactos e recompilaron arredor de 1.400 propostas, incluíndo as achegas da cidadanía a través dun buzón virtual.
Durante a súa intervención, López Campos tamén puxo o foco noutras medidas desenvolvidas a favor da lingua mentres se avanzaba paralelamente na actualización do Plan xeral de normalización da lingua galega, co obxectivo de “fomentar e prestixiar o idioma en moi diversos ámbitos e sectores profesionais”.
Entre estas actuacións, destacou os 100 cursos de lingua e cultura galegas postos en marcha para persoas procedentes de fóra de Galicia, nos que participaron máis de 1.500 persoas, así como outras iniciativas formativas dirixidas a ámbitos específicos como a sanidade, a administración pública ou a xustiza.
Así mesmo, o conselleiro salientou que en 2025 se celebraron por primeira vez as probas Celga en liña, unha iniciativa para a que se recibiron máis de 600 solicitudes e que permitiu avanzar no obxectivo de facilitar a validación e acreditación do coñecemento da lingua galega a un maior número de persoas.
López Campos tamén destacou a colaboración da Xunta nas actividades de dinamización lingüística que se desenvolven nos centros educativos, entre as que se atopan Falamos +, Fala que Fala e 21 días co galego. Todas elas, segundo indicou, están orientadas a achegar a lingua galega á mocidade e fomentar o seu uso habitual entre as novas xeracións.
No caso de Fala que Fala, trátase dunha iniciativa coorganizada por Radio Líder e a Secretaría Xeral da Lingua que promove a participación do alumnado en actividades de comunicación e divulgación en galego, contribuíndo a reforzar a presenza da lingua nos centros educativos e entre a xente nova.
Ademais, a Administración autonómica continúa a impulsar contidos dixitais destinados ao público xuvenil, como os que ofrece o portal Xabarín.gal, co propósito de incrementar a presenza do galego nos novos espazos de comunicación e consumo audiovisual.
https://admin.vive.gal/mais-de-500-estudantes-participan-este-mercores-en-santiago-na-gala-final-de-fala-que-fala/