O documental “Promover o galego dende o local” puido visualizarse por primeira vez ao público xeral este luns, 17 de novembro, no auditorio do Milladoiro. A peza, financiada polo Concello de Ames e producida por Nós Televisión, pon en valor as iniciativas que se levan desenvolvendo estes últimos anos en Ames para impulsar e promover o uso do galego en amplos ámbitos
Líder Redacción
18 de noviembre de 2025 a las 20:14
Tanto o alcalde de Ames, Blas García, como o secretario xeral da Lingua, Valentín García, coincidiron na importancia da área de Normalización nos concellos e na necesidade de que os alcaldes e alcaldesas asuman esta responsabilidade, como é o caso do Concello de Ames, para deste xeito darlle o peso que realmente merece
Ames, 18 de novembro de 2025.- Este luns, 17 de novembro, o auditorio da Casa da Cultura do Milladoiro acolleu a estrea de “Promover o galego dende o local”, un documental sobre varios programas de dinamización lingüística. A peza audiovisual, producida por Nós Televisión e financiada polo Concello de Ames, pon en valor as iniciativas que se levan desenvolvendo estes últimos anos en Ames para impulsar e promover o uso do galego en amplos ámbitos a través de proxectos como o Galetiktokers, Modo Galego, actívao!, os Premios Lingua e Empresa ou o Certame Literario.
O documental “Promover o galego dende o local” puido visualizarse por primeira vez ao público xeral este luns, 17 de novembro, no auditorio do Milladoiro. A peza, financiada polo Concello de Ames e producida por Nós Televisión, ten como obxectivo dar visibilidade ao traballo que se realiza desde as Administracións locais para fomentar o uso da lingua galega.
A dita estrea acudiron o alcalde de Ames e concelleiro de Normalización Lingüística, Blas García; o secretario xeral da Lingua, Valentín García, en representación da RAG, María López Sández; e a directora e guionista do documental de Nós Televisión, Ana Viqueira. Tamén estiveron presentes concelleiros e concelleiras do goberno municipal, do Partido Popular e do Bloque Nacionalista Galego, xunto con persoas que participaron no documental.
Tanto o alcalde de Ames, Blas García, como o secretario xeral da Lingua, Valentín García, coincidiron na importancia da área de Normalización nos concellos e na necesidade de que os alcaldes e alcaldesas asuman esta responsabilidade, como é o caso do Concello de Ames, para deste xeito darlle o peso que realmente merece. Por outra banda tamén se puxo en valor o proxecto “Modo Galego, actívao!”, programa pioneiro en Ames que moitos concellos estudan implantar para fomentar o uso do galego na infancia.
Pola súa parte, a académica da RAG, María López Sández, puxo en valor a posta en marcha do proxecto ‘Modo Galego, actívao!’, pois “Ames funcionou como espazo onde pilotar e poder exportar este proxecto a outros concellos. O galego é un asunto de país pero a acción da Administración local para o galego é moi importante e”. Así, subliñou que “o documental permite ver unha acción de conxunto ante a lingua de forma coherente e coordinada, tendo implicación en varios ámbitos, algo fundamental para poder difundir este modelo a outras zonas”.
Por outro lado, a directora e guionista do documental, Ana Viqueira, destacou que a gran satisfacción que supón para o equipo de presentar un audiovisual que aborda a situación da lingua e de como promover o galego dende a institución máis próxima a nós. Ademais, na súa intervención, tamén explicou a escolla de Ames para desenvolver o documental, “nas últimas tres décadas este municipio triplicou a súa poboación, tendo unha taxa moi alta de xente nova e de xente que naceu fóra. É un concello que leva moito tempo apostando por políticas de normalización da lingua serias e comprometidas. Un concello que ao longo do ano organiza moitos programas, convocatorias e iniciativas para promover o noso idioma e no documental fálase precisamente diso”.
O documental conta coa participación do alcalde de Ames e concelleiro de Normalización Lingüística, Blas García; o presidente da Real Academia Galega, Henrique Monteagudo; a ex-concelleira de Educación e Mocidade, Carmen Porto; a concelleira de Promoción Económica, Ana Belén Paz; a técnica de Normalización Lingüística, Rosa Moreiras; e a técnica do departamento de Mocidade, Pilar Villaverde.
Tamén participaron Alonso Caxade, Andrea Porto, Branca Trigo, Nuria Grandío, Rodri Míguez, Raquel Arias, María Cebey, Carlota Mera, Julio de la Iglesia e o alumnado e profesorado de 4º de primaria do CEIP de Barouta.
A partir deste sábado, 22 de novembro, o documental tamén poderá visualizarse na canle de Youtube de Nós Televisión, na canle número 9 de R en toda Galicia e na plataforma Movistar Plus+ no resto de España.
O documental ten unha duración de 37 minutos. A produción executiva correu a cargo de Rosabel Candal e Diego Frey. Da dirección, guión e produción ocupouse Ana Viqueira, mentres que da realización encargouse Martín Rodríguez e Diego Frey. Manuel Expósito realizou traballos de axudante de realización e da edición e montaxe ocupouse Martín Rodríguez. O deseño de grafismos e creatividades foi traballo de Roi Barros; e os operadores de Cámara e iluminación foron Pio Cribeiro, Roi Barros, Martín Rodríguez e Manuel Expósito. Ademais contouse con imaxes de dron grazas ao traballo de Pio Cribeiro, e a locución de voz en off fíxoa Xiana Arias.
“Promover o galego dende o local”
Nós Televisión é unha empresa audiovisual con sede en Ames e que, ademais, a maioría dos seus contidos son relacionados coa cultura e con lingua galega. A motivación de levar a cabo este proxecto vén de que, nestes intres, a perspectiva sobre o futuro da lingua non é positivo e o número de galegofalantes descendeu nos últimos anos.
Así, o proxecto comezou a gravarse hai un ano, en novembro do 2024. A idea naceu, inicialmente, da repercusión que tivo desenvolver o programa Modo galego, actívao! nos centros educativos de Ames. Dende un primeiro momento, buscouse enfocar a peza audiovisual dende unha visión positiva e dunha situación a longo prazo na que mellore e aumente o uso da lingua, sobre todo entre a mocidade.
4 proxectos de Ames para promover o galego
No documental abórdanse catro proxectos que o Concello de Ames desenvolve a través das Concellarías de Normalización Lingüística, Mocidade, Educación e Promoción Económica para fomentar e normalizar o uso da lingua en diferentes ámbitos, dende o educativo ata o empresarial. Así, reflíctense na peza varios eidos nos que impulsar o uso do galego, amosando que o uso da lingua pode estenderse a calquera situación da nosa vida cotiá.
Por unha banda, fálase do certame Galetiktokers, organizado polos departamentos de Mocidade e Normalización Lingüística, e que pretende motivar á mocidade á creación e divulgación de contidos en galego. O modelo a seguir son os vídeos curtos da rede social TikTok, unha das aplicacións máis populares, sobre todo entre os máis mozos e mozas.
Outro dos proxectos dos que se fala no documental son os Premios Lingua e Empresa, organizado polos departamentos de Promoción Económica e Normalización Lingüística. Esta iniciativa naceu co obxectivo de estimular o uso da lingua galega na actividade económica do concello de Ames, concretamente no eido empresarial, e recoñecer aos comercios e empresas que usen na súa vida cotiá o galego.
O Certame Literario de Ames, organizado polo departamento de Normalización Lingüística, é outro dos proxectos que protagonizan o documental. Trátase dunha iniciativa con máis de dúas décadas de andadura e que ten como obxectivo impulsar a creación literaria en lingua galega, xunto con promover e difundir a cultura propia.
Por último, abórdase o programa Modo galego, actívao!, impulsado por primeira vez hai 3 anos pola Real Academia Galega e o Concello de Ames. Este proxecto naceu co co propósito de explorar novos xeitos de promover a lingua entre a xente máis nova e avaliar os resultados, implicando e motivando a toda a comunidade educativa (Educación Infantil, Primaria e, este ano, 1º e 2º da ESO) á empregar a lingua en todos os contextos da súa vida cotiá.
Recibe las noticias en tu correo.
