A Aula da Natureza presenta a súa programación para os meses de abril, maio e xuño

• A Aula da Natureza organiza unha ampla programación de actividades para estes meses de primavera, na que ofertan diferentes saídas e obradoiros para descubrir todo o que agocha a natureza nesta época do ano
• A primeira das actividades terá lugar o vindeiro sábado 12 de abril cunha xornada que inclúe unha visita guiada ao Museo Vivente do Mel e a ruta das Fervenzas das Hortas

Ames, 3 de abril de 2025.- A Aula da Natureza xa ten lista a súa programación para estes meses de primavera, na que se inclúen varios obradoiros e visitas guiadas para gozar da paraxe que nos ofrece a natureza nesta época do ano. A primeira das actividades terá lugar este vindeiro sábado 12 de abril con “O enredo de abelleiro”, unha visita guiada ao Museo Vivente do Mel xunto cunha ruta da Fervenza das Hortas. Esta saída, apta para todos os públicos, conta con 50 prazas e desenvolverase entre as 10.30 e 18.00 horas. Cómpre destacar que se deberán abonar 3 euros pola entrada do museo. Para inscribirse a esta e ao resto de actividades da Aula da Natureza, é preciso enviar a ficha de inscrición ao enderezo auladanatureza@concellodeames.gal.

A programación de primavera da Aula da Natureza comeza este vindeiro sábado 12 de abril coa actividade “O enredo do abelleiro”, unha visita guiada ao Museo Vivente do Mel, localizada na localidade arzuana de Portodemouros. Ademais de poder descubrir de preto todo o relacionado co mundo da apicultura, nesta xornada tamén se realizará a ruta das Fervenzas das Hortas, un itinerario á beira do río Iso. A saída desenvolverase entre as 10.30 e 18.00 horas, recoméndase levar a comida da casa. Hai 50 prazas dispoñibles para participar nesta actividade e, cómpre destacar, que se deberán abonar 3 euros pola entrada ao museo.

O concelleiro de Xestión do Medio Natural e Atención ao Rural, Javier Antelo, explica que “en comparación coa programación de inverno, que estivo máis dirixida a xornadas no interior das instalacións da Aula da Natureza, desta volta son actividades moi relacionadas co exterior para aproveitar estes días de primavera nas que hai máis horas de luz e que habitualmente podemos gozar de bo tempo”.  Así mesmo, resaltou que “hai dúas actividades moi especiais dentro da programación, por unha banda as xornadas adicadas á vida castrexa para que os rapaces e rapazas coñezan de primeira man como se vivía naquela época, e as xornadas do chamado Artespantallo, para traballar e coñecer como se facían antigamente os espantallos no noso concello”.

Pola súa banda, a técnica da Aula da Natureza, Patricia Reboreda, subliñou que “é unha programación que intentamos que se achegue tanto a adultos como a rapaces na que poidan participar e aprender persoas de todas as idades, centrada sobre todo nas herbas e os usos que nos ofrecen para poder aproveitar todos os seus beneficios na nosa vida diaria”.

Programación para o mes de abril

Xunto coa saída do sábado 12 de abril, ao longo deste mes desenvolveranse dúas actividades máis da Aula da Natureza. Deste xeito, á volta de Semana Santa, o vindeiro sábado 26 de abril, terá lugar o obradoiro “Destilación de plantas aromáticas”, no que os participantes aprenderán a realizar a destilación das plantas de romeiro e eucalipto con alambique para, posteriormente, elaborar diferentes produtos. O taller realizarase nas instalacións da Aula da Natureza, en horario de 10.00 a 14.00 horas, e hai 20 prazas dispoñibles.

Así mesmo, para o domingo 27, está programado outro obradoiro, “Plantas silvestres comestibles”. Nesta ocasión, os participantes aprenderán a realizar diferentes receitas de cociña con plantas silvestres aptas para o consumo. Deste xeito, poderán coñecer algúns dos beneficios e usos que ofrecen as diferentes herbas e plantas que temos ao noso carón e que podemos atopar en calquera lugar. Hai 20 prazas dispoñibles e a actividade realizarase de 11.00 a 18.00 horas, tamén nas instalacións da Aula da Natureza.

Programación para maio e xuño

A programación de primavera da Aula da Natureza continuará ao longo dos meses de maio e xuño, con propostas variadas para todos os públicos. A primeira delas será “Vida castrexa”, unha xornada dirixida para a rapazada de 6 a 14 anos na que coñecerán de primeira man como era o mundo na Idade Media, descubrindo, da man de Francisco Ameixeras, os petróglifos ou as pinturas rupestres da época. A actividade desenvolverase o sábado 3 de maio, en horario de 11.00 a 17.30 horas, nas instalacións da Aula da Natureza, e haberá 25 prazas dispoñibles.

Por outra banda, os días 9 e 10 de maio as protagonistas serán as plantas medicinais. Deste xeito, o venres 9 realizarase unha exposición na Casa da Cultura do Milladoiro dunhas 150 plantas medicinais coas súas respectivas fichas de identificación sobre os diferentes usos que ten cada unha delas. Nesa mesma xornada, haberá un coloquio para afondar e divulgar sobre os usos das plantas medicinais na nosa vida cotiá. En canto á xornada do sábado 10, realizarase unha recollida de herbas medicinais, en horario de 11.00 a 14.00 horas. Para esta última actividade, hai 40 prazas dispoñibles.

Así mesmo, a fin de semana do 23 ao 25 de maio estará dedicada aos espantallos, coa fin de recuperar a paisaxe e tradición no rural e coñecer como se facían os espantallos antigamente en Ames. Deste xeito, na xornada do venres o Pazo da Peregrina acollerá unha exposición na que se poderán observar diferentes pinturas e fotografías de espantallos realizada pola asociación a Cañada do Arte. Continuando con esta temática, o sábado terá lugar un obradoiro colaborativo para a creación dos nosos propios espantallos. Finalmente, na xornada do domingo, haberá unha exposición con todas as obras realizadas.

Xa para rematar a programación de primavera da Aula da Natureza, no mes de xuño celebrarase a terceira edición da Feira do Pan e do Cereal de Bugallido, unha iniciativa que naceu co obxectivo de recuperar o rural e o cultivo das terras agrarias con cereais autóctonos, así como para poñer en valor os diferentes alimentos gastronómicos que podemos obter a partir deles. Por último, ás portas do verán, o 21 de xuño, realizarase a actividade “Cacho de San Xoán polos camiños do Milladoiro”, relacionada coa tradición vinculada ás herbas da noite do 23 de xuño.

Para participar en todas as actividades da Aula da Natureza é preciso enviar cuberta a ficha de inscrición, que se pode descargar na páxina web municipal, ao enderezo auladanatureza@concellodeames.gal.