20xvinte, a guía que redescobre Galicia paso a paso: agora o Camiño Fisterra-Muxía
Un camiño contado en primeira persoa: así é a nova guía 20xvinte do Camiño Fisterra-Muxía
Líder Redacción
2 de mayo de 2025 a las 20:47
A nova edición da guía 20xvinte, centrada no Camiño Fisterra-Muxía, propón unha viaxe única contada dende a experiencia de quen mellor coñece o territorio: 20 persoas locais que revelan 20 marabillas ao longo de 10 concellos.
“A filosofía de 20xvinte é que sexan as persoas as que falen do noso territorio”, explica Mónica Seoane, directora do proxecto, nunha entrevista en Radio Líder Santiago. A guía ofrece unha ollada íntima e auténtica do camiño, vista dende os ollos de veciños, profesionais e amantes da contorna.
Esta edición percorre o traxecto que parte de Santiago e se dirixe cara a costa, atravesando Ames, Negreira, Santa Comba, Mazaricos, Dumbría, Muxía, Cee, Corcubión e Fisterra. “É un camiño peculiar porque sae de Santiago e chega ao mar, ben a Fisterra ou a Muxía, ou mesmo ás dúas”, sinala Seoane.
Ao contrario doutras publicacións turísticas máis impersoais, 20xvinte preséntase como unha ferramenta viva e útil. “Non é unha guía ríxida. Aquí hai sentimento, hai persoas. Hai moito traballo detrás”, afirma. Cada guía inclúe un espazo para anotacións persoais, mapas, datos prácticos e pequenas xoias agochadas que convidan á exploración lenta e consciente.
En canto á súa distribución, esta guía editouse en 6.000 exemplares físicos, repartidos entre os concellos implicados e unha rede de 40 establecementos hoteleiros. Ademais, está dispoñible en formato dixital e de balde, accesible dende a páxina web oficial e mediante código QR.
O impacto deste proxecto vai máis alá da promoción turística. Segundo relata Mónica Seoane, hai quen mesmo cambiou de vida despois de percorrer un destes camiños. “Coñezo xente que despois de facer o camiño vendeu todo e mercou unha casiña en Galicia”, conta.
A guía foi tamén presentada na feira internacional FITUR, onde destacou como modelo de promoción sostible baseado no contacto humano. “Galicia está a converterse nun refuxio climático natural. Antes era o San Benito da chuvia, agora presumimos do clima”, comenta Seoane cun sorriso.
Con esta xa van 15 guías publicadas baixo o selo 20xvinte, e o proxecto non semella ter freo. “Hai outros camiños nos que estamos traballando, pero aínda non podemos falar deles”, adianta. Ademais, avanza unha nova colaboración coa marca Chiruca para unha edición “máis sentimental”.
